ފަލަސްތީނަށް އ.ދ.ގެ ފުރިހަމަ މެންބަރުކަން ދޭން އދ.ގެ އާންމު މަޖިލީހުން ފާސްކޮށްފިއެވެ.
މިގޮތަށް ފާސްކޮށްފައިވަނީ އިއްޔެ ކުރިއަށް ގެންދިޔަ އދ.ގެ އާންމު މަޖިލީހުގެ ކުއްލި ބައްދަލުވުމެއްގައެވެ.
ފަލަސްތީނަށް އދ.ގެ ފުރިހަމަ މެންބަރުކަން ދިނުމަށް އދ.ގެ އާންމު މަޖިލީހުގެ ކުއްލި ބައްދަލުވުމަށް ހުށަހަޅާފައިވަނީ ޔޫއޭއީއިންނެވެ. ޔޫއޭއީއިން ހުށަހެޅި މި ޤަރާރަކީ ދިވެހިރާއްޖެއިންވެސް ކޯ-ސްޕޮންސާ ކޮށްފައިވާ ޤަރާރެކެވެ.
ފަލަސްތީނަށް އ.ދ.ގެ ފުރިހަމަ މެންބަރުކަން ދޭން ފެންނަކަމަށް 143 ގައުމަކުން ވޯޓު ދިނެވެ. އަދި ފަލަސްތީނަށް އ.ދ.ގެ ފުރިހަމަ މެންބަރުކަން ދިނުމާ ދެކޮޅަށް 9 ގައުމަކުން ވޯޓު ދީފައިވެއެވެ. އަދި ވަކިގޮތަކަށް ވޯޓު ނުދީ 25 ގައުމަކުން ތިއްބެވެ.
ފަލަސްތީނަށް އ.ދ.ގެ ފުރިހަމަ މެންބަރުކަން ދޭން އާންމު މަޖިލިސްއިން ފާސްކުރިނަމަވެސް ފަލަސްތީނަކީ އދ.ގެ ފުރިހަމަ މެމްބަރު ގައުމެއްގެ ގޮތުގައި ކަނޑައެޅޭނީ އދ.ގެ ސަލާމަތީ މަޖިލީހުން އެގޮތަށް ފާސް ކުރުމުންނެވެ. މިފަހުންވެސް ފަލަސްތީނަށް އ.ދ.ގެ މެންބަރުކަން ދިނުމަށް އެދި ފަލަސްތީނުން ސަލާމަތީ މަޖިލިހަށް މައްސަލަ ހުށަހެޅިއެވެ. އެހެންނަމަވެސް އެ މައްސަލަވެސް ސަލާމަތީ މަޖިލީހުގައި އެމެރިކާއިން ވަނީ ވީޓޯ ކޮށްފައެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ދެމުންގެންދާ ހަމަލާތައް ހުއްޓާލާ، ނަސްލުނައްތާލުމަށް ހިންގަމުންދާ ޖަރީމާތައް ހުއްޓާލުމަށް ދުނިޔޭގެ ގިނަ ގައުމުތަކަކުން ދަނީ ގޮވާލަމުންނެވެ. އަދި އެކި ގައުމުތަކުގައި އިޒްރޭލުގެ ލާއިންސާނީ އަމަލުތަކާ ދެކޮޅަށް އުފުލަމުންދާ އަޑު ވަނީ ގަދަވެފައެވެ.