ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމުގެ ގޮތުން ފެށި "ކުރަނގި" އޮޕަރޭޝަންގެ ތެރެއިން މިހާތަނަށް 500 ވުރެ ގިނަ ބިދޭސީންގެ ބަޔޮމެޓްރިކް ޑާޓާ ނަގައިފި އެވެ.
މި އޮޕަރޭޝަން އެންމެ ފުރަތަމަ ކ. ހިންމަފުށީފައި ފެށީ މި މަހުގެ 2 ފަ އެވެ.
މިކަމާ ގުޅޭ އެންމެ ފަހުގެ ތަފާސްހިސާބުތައް ހިއްސާކުރައްވައި ހޯމްލޭންޑް މިނިސްޓަރު އިހްސާން ވިދާޅުވީ އެ ރަށުގައި ފެށި މި މަސައްކަތުގައި ދަށުން ރަށުގައި މަސައްކަތް ކުރަމުން އަންނަ 532 ބިދޭސީއެއްގެ ބަޔޮމެޓްރިކް ޑާޓާ މިހާތަނަށް ނަގާފއިވާ ކަމަށެވެ.
ބަޔޮމެޓްރިކް ޑާޓާގެ ގޮތުގައި ނަގަމުން އަންނަނީ 10 އިނގިލީގެ ނިޝާނާއި ފޭޝަލް ރެކޮގްނިޝަން ހެދޭވަރު ފޮޓޯއެކެވެ.
"ނެގި ޑާޓާ މިހާރު ވަނީ ބިދޭސީ މަސައްކަތްތެރިންގެ މަޢުލޫމާތު ބަލަހައްޓާ ސިސްޓަމަށް އަޕްލޯޑްކުރެވިފައި. ދާދި އަވަހަށް ރާއްޖޭގެ އިތުރު ފަސް ސަރަހައްދެއްގައި ވެސް އެއްފަހަރާ މި މަސައްކަތް ފެށޭނެ." މިނިސްޓަރު ވިދާޅު ވިއެވެ.
ބިދޭސީން ގަވައިދަށް ފެއްތުމަށް މަސައްކަތް މިމަހު ފަށާފއިވާ އިރު އެ މަސައްކަތް އެއްފަހަރާ ރާއްޖޭގެ ހުރިހާ ރަށެއްގައި މަހެއްހާ ދުވަހުގެ ތެރޭގައި ފަށާނެ ކަމަށް ވެސް މިނިސްޓަރު ވިދާޅުވި އެވެ. މިކަން ކުރިޔަށް ގެންދާނީ ފުލުހުންނާއި ކައުންސިލްތަކާއި ގުޅިގެންނެވެ.
ސަރުކާރުގެ އަމާޒަކީ ގަވައިދާ ހިލާފަށް އުޅޭ ބިދޭސީންގެ މައްސަލަ ތިން އަހަރުގެ ތެރޭގައި ހައްލުކުރުމެވެ.