މާލޭ ރަސްމީ ފާލަން ބާވެ، ހަލާކުވަމުންދާތީ އެތަނުގެ ޑިޒައިން ބަދަލުކޮށްގެން އަލުން މަރާމާތު ކުރުމުގެ މަސައްކަތް ފަށަން ތައްޔާރުވެއްޖެ އެވެ.
އެމްޓީސީސީއާ ހަވާލުކޮށްގެން އެ މަޝްރޫއު ކުރިއަށް ގެންދަނީ 11.7 މިލިއަން ރުފިޔާ ހަރަދުކޮށްގެންނެވެ. މާލެ ރަސްމީ ފާލަން ނުވަތަ އިއްޒުއްދީން ފާލަމަކީ ރާއްޖޭގެ ވެރިރަށުގެ މޫނުމަތީގައި އޮތް ފާލަމެވެ. އެތަނުގެ މަރާމާތަށް މިހާރު އޮތީ ބަންދު ވެސް ކޮށްފަ އެވެ.
އެމްޓީސީސީން ބުނީ މަރާމާތުގެ އަމަލީ މަސައްކަތް ވަރަށް އަވަހަށް ފަށާނެ ކަމަށެވެ.
ރިޔާ ދޯންޏެއް ސިފަކޮށްދޭ ގޮތަށް އިއްޒުއްދީން ފާލަން ބަދަލުކުރީ ރާއްޖޭގެ މިނިވަންކަމުގެ ރަން ޔޫބީލް 2015ގައި ފާހަގަކުރުމާ ދިނާކޮށެވެ. އޭރުގެ އެ ޑިޒައިނަކީ އޭރުގެ ޗީފް އޮފް ޑިފެންސް ފޯސް މޭޖާ ޖެނެރަލް އަހުމަދު ޝިޔާމްގެ ޑިޒައިނަަކަށް އެމްޓީސީސީން ކުރިއަށް ގއންދިޔަ މަސައްކަތެކެވެ.
މި ފާލަމުގެ ބޮޑު މަރާމާތެއް އެންމެ ފަހުން ކުރީ 2017 ގަ އެވެ.