ވައުދާ އެއްގޮތަށް އިންޑިއާ ސިފައިން ފޮނުވާލެވިއްޖެ

ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް އިންޑިއާ ސިފައިން ފޮނުވާލެވިފައިވާ ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވިއެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑިފެންސް މިނިސްޓަރު ޣައްސާން މައުމޫން ވިދާޅުވީ، ރާއްޖޭގައި ޤާއިމުވެ ތިބީ އިންޑިއާގެ 76 ސިފައިންކަމަށާއި، އެ އެންމެންވެސް މިހާރު ގައުމަށް ފޮނުވާލެވިފައިވާ ކަމަށެވެ.

ރައީސް މުއިއްޒުގެ ވައުދާއި އެއްގޮތަށް އިންޑިއާ ސިފައިން ރާއްޖެއިން ފޮނުވާލެވިއްޖެކަން ފާހަގަކުރައްވާ މިނިސްޓަރު ޣައްސާން ވިދާޅުވީ، ކުރު މުއްދަތެއްގައި ތެރޭގައި އިންޑިއާ ސިފައިން ފޮނުވާލެވުނީ މަޝްވަރާގެ އުސޫލުގެ ތެރެއިން ރައީސް މުއިއްޒުގެ ހިކުމަތްތެރި ވިސްނުމުގެ ސަބަބުން ކަމަށެވެ.

މި ޕްރެސް ކޮންފަރެންސްގައި މައުލޫމާތު ދެއްވަމުން ފޮރިން މިނިސްޓަރު މޫސާ ޒަމީރު ވިދާޅުވީ 7 މާޗުގައި 12 އިންޑިއާ ސިފައިން، 9 މާޗުގައި 14 އިންޑިއާ ސިފައިން، 7 އޭޕްރިލްގައި 13 ސިފައިން، 9 އޭޕްރިލްގައި 12 ސިފައިން، 7 މޭ ގައި 12 ސިފައިން އަދި 9 މޭގައި 13 އިންޑިއާ ސިފައިން އަނބުރާ ގެންދިޔަ ކަމަށެވެ.

އިންޑިއާގެ ސިފައިންގެ ބަދަލުގައި ހެލިކޮޕްޓަރު އަދި ޑޯނިއާ އޮޕަރޭޓް ކުރުމަށް އިންޑިއާއިން ފޮނުވި އާންމުންނަކީ ހެލިކޮފްޓަރު އުފެއްދި ކުންފުނީގެ މީހުން ކަމަށް މިނިސްޓަރު ޒަމީރު ވިދާޅުވިއެވެ. އެ ކުންފުންޏަކީ "ހިންދުސްތާން އެރޮނޮޓިކްސް" ކިޔާ ކުންފުންޏެއް ކަމަށްވެސް ވިދާޅުވިއެވެ.