ސްރީ ލަންކާގެ އަސްކަރިއްޔާއާ ގުޅިގެން އެމްއެންޑީއެފުން ހިންގި "ބޭސިކް އެކްސްޕްލޯސިވް އޯޑްނަންސް ޑިސްޕޯސަލް ކޯސް–3" (ލެވެލް 2) ނިންމާލައިފި އެވެ.
އެ ކޯސް ނިންމުމުގެ ރަސްމިއްޔާތު މިއަދު ބޭއްވީ އައްޑޫ ގަމުގައި ގާއިމުކޮށްފައިވާ އެމްއެންޑީއެފް ސަދަން އޭރިއާ ކޮމާންޑް ހެޑްކުއޯޓަރުގަ އެވެ.
ރަސްމިއްޔާތު ޝަރަފުވެރިކޮށްދެއްވައި، ކޯހުން ދަސްވެނިވުނު ސިފައިންނަށް "އީއޯޑީ ބެޖު" ހަވާލުކޮށްދެއްވީ އެމްއެންޑީއެފް ސަދަން އޭރިއާ ކޮމާންޑުގެ ކޮމާންޑަރު ކާނަލް މުޙައްމަދު ޖަމްޝާދެވެ.
މި ކޯސް ފުރިހަމަކުރި ސިފައިންނަށް ހަނދާނީ ލިޔުން ހަވާލުކޮށްދެއްވީ ކޯހުގެ އިންސްޓްރަކްޓަރުންގެ ގޮތުގައި މަސައްކަތް ކޮށްދެއްވި ލަންކާގެ އާމީ އިންޖިނިއަސްގެ އިންސްޓަކްޓަރުންނާއި، ކޯހުގެ ކޯސް އޮފިސަު، ލެފްޓިނެންޓް ޚާތިމް އަހުމަދެވެ.
މާޗް 24 އިން އިއްޔެގެ ނިޔަލަށް ސަދަން އޭރިއާ ކޮމާންޑްގައި ކުރިއަށް ގެންދިޔަ މި ކޯހުން 27 ސިފައިން ވަނީ ދަސްވެނިވެފައެވެ. ކޯހުން އެއްވަނަ ހާސިލުކުރީ ލާންސް ކޯޕްރަލް މުޙައްމަދު ސާވިން އެވެ. އަދި ޕްރައިވެޓް ފާތިމަތު ޝަހުދާ އަބޫބަކުރު ކޯހުން ދެވަނަ ހާސިލުކުރި އިރު، ކޯހުން ތިންވަނަ ހާސިލުކުރީ ސްޓާފް ސާޖަންޓް މުޙައްމަދު ރަފީގު އެވެ.
އީއޯޑީ ލެވެލް 2 ކޯހަކީ ކޮންވެންޝަނަލް މިއުނިޝަން ޑިސްޕޯސަލްއާއި އެކްސްޕްލޯސިވް އޯޑްނަންސް ޑިސްޕޯސަލާއި އެކި ކަހަލަ ނުރައްކާތެރި ހަޒާޑަސް އެއްޗެހި ރަައްކާތެރިގޮތުގައި ނައްތާލުމާއި، އެކިކަަހަލަ ނުރައްކާތެރި ތަކެތި ދެނެގަނެ ރައްކާތެރި ތަނެއްގެ ގޮތުގައި ދެމެހެއްޓުމުގެ ޢިލްމާއި ހިލްމު އުނގަންނައި ދިނުމަށް ހިންގި ކޯހެކެވެ.
ކޯހުގައި ނަގައިދިން ބައިތަކުގެ ތެރޭގައި އެކްސްޕްލޯސިވްސް، ޑިމޮލިޝަން، ބޫބީ ޓްރެޕްސް، އާމްސް އެންޑް އެމިއުނިޝަން، އިމްޕްރޮވައިޒްޑް އެކްސްޕްލޯސިވް ޑިވައިސް ޑިސްޕޯސަލް، އެކްސްޕްލޯސިވް އޯޑްނަންސް ޑިސްޕޯސަލް، ސަރޗް ޓެކްނިކްސް އަދި މައިން ވޯފެއާ ހިމެނެ އެވެ.