ގއ. ކޫއްޑޫން ފައިލޭރިއާގެ ކޭސްތަކެއް ފެނިއްޖެ އެވެ.
މިފްކޯ އިން ބުނީ މިިދިޔަ ބުރާސްފަތި ދުވަހު ގއ. އަތޮޅު ހޮސްޕިޓަލުން ކޫއްޑޫގައި ކުރިއަށް ގެންދިޔަ ހެލްތު ސްކްރީން ޕްރޮގްރާމެއްގައި އިންޑިއާގެ ތިން މީހަކު ފައިލޭރިއާ އަށް ޕޮޒިޓިވް ވެފައިވާ ކަމަށެވެ. އަދި އެ ތިން މީހުންނަށް ވަގުތުން ފަރުވާ ދީފައިވާ ކަމަށާއި ފަރުވާ ފުރިހަމަ ކުރުމަށް ފަހު މިހާރު އެ މީހުން އަލުން އެނބުރި މަސައްކަތަށް ނުކުމެފައިވާ ކަމަށް ވެސް މިފްކޯ އިން ބުންޏެވެ.
އެ ކުންފުނިން ބުނީ މިކަމާ ގުޅިގެން މިފްކޯގެ ހުރިހާ ފެކްޓްރީތަކެއްގައި ފައިލޭރިއާ އަށް ސްކްރީން ކުރުމުގެ ޕްރޮގްރާމްތަކެއް މިހާރު ފަށާފައިވާ ކަމަށެވެ.
މިފްކޯގެ ހަތަރު ފެކްޓަރީއެއް އެކި ހިސާބުތަކުގައި އަންނަނީ ހިންގަމުންނެވެ އެވެ. އެއީ ކޫއްޑު މަސް ފެކްޓަރީ، ފެލިވަރު މަސް ފެކްޓަރީ، އައްޑޫ މަސް ފެކްޓަރީ އަދި ކަނޑުއޮތްގިރީގައި ހިންގާ ފެކްޓަރީ އެވެ.
ރާއްޖޭން ނައްތާލެވިފައިވާ ފައިލޭރިއާގެ ކޭސްތަކެއް މިދިޔަ ޑިސެމްބަރު މަހު ކުޅުދުއްފުށިންނާއި މާލޭ އޭރިއާއިން ވެސް ފެނިގެން ސްކްރީން ޕްރޮގްރާމެއް ފުޅާ ދާއިރާއެއްގައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކުރިއަށް ގެންގޮސްފައިވެ އެވެ.