އައްޑޫ މީދޫގެ މަތިކިޅި އިކޯ ގާޑަން އަށް ވަނުމުށްޓަކައި މިއަދުން ފެށިގެން ފީއެއް ދައްކަން ޖެހޭ އުސޫލަށް އަމަލު ކުރަން ފަށައިފި އެވެ.
އެތަނަށް ވަނުމަށްޓަކައި ފީއެއް ނަގަން ކައުންސިލުން ފާސްކުރީ މި މަހުގެ 2 ގަ އެވެ. ކައުންސިލުން ބުނީ އެ އުސޫލަށް މިއަދުން އަމަލު ކުރަން ފަށާފައިވާ ކަމަށެވެ.
ގުދުރަތީ ހިތްގައިމުކަން ދައްކުވައިދޭ މަތިކިޅި އިކޯ ގާޑަން އަށް ވަންނަން ފީ ނެގުމާ ގުޅޭ އުސޫލުގައިވާ ގޮތުން އެންޓްރޭންސް ފީ އަށް ދިިވެހިންގެ އަތުން ނަގާނީ 10ރ. އެވެ. އަދި ޓޫރިސްޓުންނަށް އެންޓްރޭންސް ޓިކެޓްސް 50ރ. އަށް ވިއްކާ އިރު، ވޯކް ވިސާގައި އުޅޭ ބިދޭސީންނަށް ޓިކެޓް ވިއްކާނީ 15ރ. އަށެވެ.
އެ ޓިކެޓަށް ގާޑަން ތެރޭގައި އުޅެވޭނީ ގިނަވެގެން 45 މިނިޓަށެވެ.
ޕާޓީތަކާއި އެ ނޫން ވެސް އެކިއެކި ހަފުލާތަކަށް މަތިކިޅި އިކޯ ގާޑަން ކުއްޔަށް ވެސް ދޫކުރާނެ އެވެ. އެގޮތުން ތިން ގަޑިއިރަށް ތަން ކުއްޔަށް ދޭނީ 800ރ. އަށެވެ. އަދި އެ ވަގުތަށް ވުރެ އިތުރުވާ ކޮންމެ ގަޑިއަކަށް 100ރ. ނަގާނެ އެވެ.
ކައުންސިލުން ބުނީ މަތިކިޅި އިކޯ ގާޑަން އަށް ލިބޭ ފައިސާ ބޭނުން ކުރާނީ އެތަން ބެލެހެއްޓާއި ތަން އިތުރަށް ފުރިހަމަ ކުރަން ބޭނުންވާ އެކިއެކި މަސައްކަތްތައް ކުރުމަށެވެ.