ރައްޔިތުންނަށް މައުލޫމާތު ހިއްސާކުރަނީ ކޯޓާ ޗެލެންޖު ކުރުމަށް ނޫން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ހޯމް މިނިސްޓަރު އަލީ އިހުސާން އަދި ފުލުހުންގެ ވެރިންތަކެއް ކްރިމިނަލް ކޯޓުގެ ހުރުމަތް ކެނޑި ކަމަށް ތުހުމަތު ކޮށްފައިވަނީ މިދިޔަ އޭޕްރިލް މަހުއެވެ. މި ތުހުމަތު ކުރެވުނީ ޑްރަގްގެ މައްސަލައެއް ކޯޓުން ނިންމި ފަހުން އެ މައްސަލައިގައި ފުލުހުން މީޑިއާއާ ބައްދަލުކޮށް ތަފްސީލީ މައުލޫމާތުތަކެއް ހާމަކުރުމުންނެވެ.
ހޯމް މިނިސްޓްރީން އިއްޔެ ކުރިއަށް ގެންދިޔަ ނޫސްވެރިންގެ ބައްދަލުވުމުގައި ހޯމް މިނިސްޓަރު އިހުސާން ވިދާޅުވީ، ގިނަ ރައްޔިތުންގެ ކަންބޮޑުވުން އޮންނަ ބޮޑެތި މައްސަލަތަކުގެ މައުލޫމާތު އާންމު ކުރުމަކީ ޕްރޮސީޖަރަލީ ކުރަން ނިންމި ކަމެއް ކަމަށެވެ.
އިހުސާން ވިދާޅުވީ އެކަންކުރަން ނިންމީ އެއްވެސް ހާލެއްގައި ކޯޓާ ޗެލެންޖު ކުރަން ނޫން ކަމަށެވެ. އަދި ފުލުހުންގެ މުއައްސަސާ ދުވަހަކުވެސް ކޯޓާ ޗެލެންޖު ނުކުރާނެ ކަމަށް ވެސް ވިދާޅުވިއެވެ.
2021 ވަނަ އަހަރު ހުޅުމާލޭގައި ފުލުހުން ހިންގި ހާއްސަ އޮޕަރޭޝަންތަކެއްގައި އަތުލައިގަތް 119 ކިލޯގެ ޑްރަގްސްގެ މައްސަލައިގައި ހިމެނޭ 2 މީހަކު ސަލާމަތްވުމުން، އެ މައްސަލައިގެ ހުރިހާ ތަފްސީލެއް ރައްޔިތުންނަށް ހާމަކުރުމަށް ހޯމް މިނިސްޓަރު އަލީ އިހުސާން ފުލުހުންނަށް އެންގެވިއެވެ. އަދި އެ އެންގެވުމާ ގުޅިގެން ފުލުހުން ވަނީ އެ މައްސަލައިގެ މައުލޫމާތުތައް ހާމަކޮށްފައެވެ.
މި މައްސަލައިގައި ކްރިމިނަލް ކޯޓުން މިދިޔަ މަހު ބުނެފައިވަނީ، މިނިސްޓަރު އިހުސާން އަދި ދިވެހި ފުލުހުންގެ ޚިދުމަތުގެ ޗީފް ސުޕްރިޓެންޑެންޓް އަހްމަދު ޝާކިރާއި ޗީފް އިންސްޕެކްޓަރ އަހްމަދު ވަހީދު އަދި ސަބްއިންސްޕެކްޓަރ މަމްދޫހް ހަސަން، ފަނޑިޔާރުންނަށް ނުފޫޒު ފޯރުވުމާއި، ފަނޑިޔާރުންގެ ސަލާމަތާއި ރައްކާތެރިކަން ގެއްލުވާލައި، ކޯޓު ހުރުމަތް ކެނޑި މައްސަލައާ މެދު ގޮތެއް ނިންމުމަށް، ކްރިމިނަލް ކޯޓުގެ ޤާޟީންގެ ކުއްލި މަޖިލީހަށް އެޖެންޑާ ކޮށްފައިވާ ކަމަށެވެ.