މާލޭ ރަސްމީ ފާލަން ތަރައްގީ ކުރާނީ ޤައުމިއްޔަތާ، ސަގާފަތް ރަމްޒުކޮށްދޭ ގޮތަށް ކަމަށް އެމްޓީސީސީން ބުނެފިއެވެ.
ރަސްމީ ފާލަން ތަރައްގީ ކުރުމުގެ މަސައްކަތް ކޮންސްޓްރަކްޝަން މިނިސްޓްރީން ހަވާލު ކޮށްފައިވަނީ އެމްޓީސީސީއާއެވެ. އެ ކުންފުނިން ވަނީ ފާލަށް ތަރައްގީ ކުރުމުގެ އަމަލީ މަސައްކަތް ފަށާފައެވެ.
މި މަސައްކަތާ ގުޅޭގޮތުން އެމްޓީސީސީން ބުނެފައިވަނީ، ރަސްމީ ފާލަމަކީ ދިވެހި ޖުމްހޫރިއްޔާގެ އިއްޒަތާއި، ސިޔާދަތާއި، ދިވެހިންގެ އަމިއްލަވަންތަކަން ރަމުޒުކޮށްދޭ މުހިންމު ބިނާއެއް ކަމަށެވެ. އެގޮތުން ރާއްޖޭގެ މިނިވަންކަމަށް 50 އަހަރު ފުރުމުގެ މުނާސަބަތާ ގުޅިގެން ފާލަށް އެންމެ ފަހުންވެސް ފަރުމާކުރީ އެކުންފުނިންކަން ފާހަގަކޮށްފައިވެއެވެ.
އެމްޓީސީސީން ބުނެފައިވަނީ ފާލަން މިހާރު ހުރީ ވަރަށް ބޮޑަށް ވީރާނާވެ މަރާމާތަށް ބޭނުންވެފައި ކަމަށެވެ.
"އެގޮތުން އަލުން ތަރައްގީ ކުރެވޭ ރަސްމީ ފާލަމަކީ ދިވެހިންގެ ޤައުމިއްޔަތާއި، ސަގާފަތް ރަމްޒުކޮށްދޭ، ގިނަ ދުވަހު ބޭނުންކުރެވޭފަދަ ފެންވަރު ރަނގަޅު ފާލަމަކަށްވާނެ ކަމުގެ ޔަޤީންކަން މި ކުންފުނިން ދިވެހި ރައްޔިތުންނަށް އަރުވަމެވެ." އެމްޓީސީސީން ބުނެފައިވެއެވެ.
ރަސްމީ ފާލަން ތަރައްގީ ކުރުމުގެ މަސައްކަތް އެމްޓީސީސީއަށް ހަވާލުކޮށްފައިވަނީ 11.7 މިލިއަން ރުފިޔާއަށް 270 ދުވަހުގެ ތެރޭގައި ނިންމާގޮތަށެވެ.
މި މަޝްރޫއުގެ ދަށުން ކުރީގެ ޖެޓީ ރޫޅާލުމާއި، އައު ޖެޓީގެ ކޮންކްރީޓް މަސައްކަތާއި، ސްޓީލް ސްޓްރަކްޗަރ ފަރުވާމުރުމާއި ލަކުޑި އަދި މަތިވަޑާމުގެ މަސައްކަތް ހިމެނެއެވެ.