ދައުލަތަށް އަނބުރާ ހޯދަން އެނގި 50.3 މިލިއަން ރުފިޔާގެ ތެރެއިން އަނބުރާ ހޯދިފައިވަނީ ދެ ލައްކަ ރުފިޔާކަން އެންޓި ކޮރަޕްޝަން ކޮމިޝަން (އޭސީސީ) ގެ 2023 ވަނަ އަހަރުގެ ތަފާސްހިސާބު ރިޕޯޓުން ހާމަވެއްޖެއެވެ.
އޭސީސީން މިއަދު އާންމުކުރި ރިޕޯޓްގައި ވާގޮތުން 2023 ވަނަ އަހަރު 15 މައްސަލައަކާ ގުޅިގެން ދައުލަތަށް އަނބުރާ ލިބެންޖެހޭ 74.2 މިލިއަން ރުފިޔާ ހޯދުމަށް ވަނީ ނިންމާފައެވެ. އޭގެތެރެއިން 10 މައްސަލައަކާ ގުޅޭ 50،370،521.75 ރުފިޔާ އަނބުރާ ހޯދުމަށް ވަނީ އަންގާފައެވެ.
އެހެންނަމަވެސް ދައުލަތަށް އަނބުރާ ހޯދިފައިވަނީ އޭގެތެއިން 234،531.57 ރުފިޔާއެވެ.
2023 ވަނަ އަހަރު އޭސީސީއަށް ޖުމުލަ 1151 ޝަކުވާއެއް ހުށަހަޅާފައިވެއެވެ. އޭގެތެރެއިން 742 މައްސަލައެއް ރަޖިސްޓްރީ ކޮށްފައިވާއިރު، ޕްރިލިމިނަރީ ތަހުގީގު މަރުހަލާގައި 365 މައްސަލައަކާމެދު ގޮތް ނިންމާފައިވެއެވެ.
އޭސީސީގެ ރިޕޯޓްގައިވާގޮތުން އެކޮމިޝަނުން މިދިޔަ އަހަރުގެ ވަނީ 220 މައްސަލައެއް ބަލައި ނިންމާފައެވެ. އަދި 40 މައްސަލައެއް ޕްރޮސިކިއުޓަރ ޖެނެރަލްގެ އޮފީހާއެކު ކުރިއަށް ގެންދާ ޑިއުޓީ ޕްރޮސިކިއުޝަން މަރުހަލާއަށް ހުށަހަޅާފައިވާކަންވެސް ފާހަގަ ކޮށްފައިވެއެވެ.