ފަތުރުވެރިކަމުގެ ސިނާއަތުން ދައުލަތުގެ ބަޖެޓަށް ލިބޭ އާމްދަނީ 2027 ވަނަ އަހަރު ނިމޭއިރު 6 ބިލިއަން ޑޮލަރަށް އެރުވޭނެ ކަމުގެ އުންމީދު އެބައޮތް ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.
ދައުލަތުގެ މީޑިއާގައި ރޭ ވާހަކަދައްކަމުން ފައިސަލް ވިދާޅުވީ، ފަތުރުވެރިކަމުގެ ސިނާއަތް ކުރިއެރުވުމަށް މަސައްކަތްތަކެއް ކުރައްވަމުން ގެންދަވާކަމަށެވެ. އެގޮތުން ހެލްތު، ސްޕޯޓްސް އަދި އެޑިއުކޭޝަނަލް ޓޫރިޒަމް ކުރިއަށް ގެންދިއުމަށް ނިންމާފައިވާކަން ފާހަގަކުރެއްވިއެވެ.
މިހާތަނަށް އައިއިރު ފަތުރުވެރިކަމުގެ ސިނާއަތުން ބަޖެޓަށް ލިބެނީ އަހަރެއްގެ މައްޗަށް 4.5 ބިލިއަން ޑޮލަރުކަން ފާހަގަކުރައްވާ މިނިސްޓަރު ފައިސަލް ވިދާޅުވީ ކުރިއަށް އޮތް 4 އަހަރުތެރޭ އެ އަދަދު 6 ބިލިއަން ޑޮލަރަށް އެރުވޭނެކަމުނެ އުންމީދު އެބައޮތް ކަމަށެވެ.
"އިރާދަކުރެއްވިއްޔާ ވަރަށް އުންމީދު އެބައޮތް 2027 ނިމެންވާއިރު 6 ބިލިއަނެއްހާ ޑޮލަރު ފަތުރުވެރިކަމުގެ ދާއިރާއިން ދައުލަތުގެ ބަޖެޓަށް ކޮންޓްރިބިއުޓް ކުރާނެ ކަމަށް." ފައިސަލް ވިދާޅުވިއެވެ.
މީގެއިތުރުން މިނިސްޓަރު ފައިސަލް ވިދާޅުވީ މިއަހަރުގެ އަމާޒަކީ ރާއްޖެއަށް 2 މިލިޔަން ފަތުރުވެރިން ގެނައުން ކަމަށެވެ. މިއީ ލޯސީޒަނަށް ވުމުން ރާއްޖެއަށް ފަތުރުވެރިން އަންނަ މިންވަރު މިދުވަސްވަރު ތަންކޮޅެއް މަދުވެފައިވާކަން ފާހަގަކޮށް މިނިސްޓަރު ވިދާޅުވީ ރާއްޖެ މާކެޓް ކުރުމުގެ ބޮޑެތި މަސައްކަތްތަކެއް ކުރަމުންގެންދާ ކަމަށެވެ.
މި 5 އަހަރުތެރޭ 3 މިލިއަނާއި 4 މިލިއަނާ ދެމެދުގެ އަދަދަކަށް ފަތުރުވެރިން ޒިޔާރާތް ކުރާ މިންގަނޑު ހާސިލު ކުރެވިދާނެ ކަމަށްވެސް މިނިސްޓަރު ފައިސަލް ވިދާޅުވިއެވެ.