މާލޭ ސަރަހައްދުގައި ކުރާ ޓެކްސީ ދަތުރުތަކަށް ނެގޭނެ ކަމަށް ކަނޑައެޅި އަގުތައް ރިވިއު ކުރުމަށް ޓެކްސީ ޑްރައިވަރުން ގޮވާލައިފިއެވެ.
ހަތަރު ފުރޮޅުލީ އުޅަނދުގައި ޓެކްސީ ދަތުރު ކުރެވޭ އަގުތައް ޓްރާންސްޕޯޓް މިނިސްޓްރީން ކަނޑައަޅާ އާންމު ކުރީ އިއްޔެއެވެ. އެ އަގުތަކަށް މި މަހުގެ 20 އިން ފެށިގެން އަމަލުކުރަންޖެހޭނެ ކަމަށް ޓްރާންސްޕޯޓް މިނިސްޓްރީން ބުނެފައިވެއެވެ.
ޓްކްސީ ޑްރައިވަރުން އެމީހުންގެ ކަންބޮޑުވުންތައް ހިއްސާކޮށް މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ބުނެފައިވަނީ، ފާއިތުވި އަހަރުތަކުގައި ހުރިހާ ހިދުމަތެއްގެ އަގުބޮޑުވި ކަމަށާއި އަދި ހުރިހާ ތަކެތީގެ އަގު ބޮޑުވިކަމަށެވެ. ނަމަވެސް ޓެކްސީގެ އަގު ހެޔޮކުރަންޖެހޭނެ ކަމަށް ސަރުކާރުން ބުނާތީ އެކަމުގެ ކަންބޮޑުވުން ފާޅުކޮށްފައިވެއެވެ.
ޓެކްސީ ޑްރައިވަރުން ބުނެފައިވަނީ އެމީހުންގެ ޑިމާންޑަކީ ޓެކްސީގެ އަގަށް ރަނގަޅު ބަދަލެއް ގެނައުން ކަމަށެވެ. އަދި މިހާރު ކަނޑައަޅާފައިވާ އަގުތައް ކަނޑައަޅާފައިވަނީ އެއްވެސް މަޝްވަރާއަކާ ނުލާކަމަށްވެސް ބުނެފައިވެއެވެ.
މީގެއިތުރުން ޓެކްސީ ޑްރައިވަރުން ވަނީ، އެމްޓީސީސީން ޓެކްސީ ހިދުމަތް ދޭން މަސައްކަތް ކުރަމުން އަންނަ ކަމަށް ތުހުމަތުކޮށްފައެވެ. އަދި ސަރުކާރުން ޓެކްސީ ކުރުމުގެ ތެރެއަށް ނުވަދެ، ކުރިން ވެސް ނަގަމުންދިޔަ އަގުގައި ދަތުރުކުރެވޭނެ ގޮތް ހަމަޖައްސައިދިނުމަށް ގޮވާލާފައިވެއެވެ.