2018 ވަނަ އަހަރު ތޫނު އެއްޗަކުން ހަމަލާދީ މަރާލި ގދ. ފަރެސްމާތޮޑާ، ކޮކާ، އިބްރާހިމް އާގިލްގެ މަރުގެ މައްސަލައިގައި ދައުވާކުރި ތިން މީހުންގެ ތެރެއިން އެކަކުގެ މައްޗަށް ކުށް ސާބިތު ނުވާކަމަށް ކްރިމިނަލް ކޯޓުން ހުކުމް ކޮށްފިއެވެ.
އާގިލް މަރާލި މައްސަލައިގައި ދައުވާ އުފުލާފައިވަނީ ލ. ފޮނަދޫ / ހިޔާ ހަމްދޫން ހަމްޒަތު، ހއ. ދިއްދޫ / ސްނޯބާޑް އިބްރާހީމް ވިޝާމް އަދި ސ. ހިތަދޫ / ސްވޭހުހީނާގެ އަލީ މިޖުވާދު މާލިކު އިބްރާހީމްގެ މައްޗަށެވެ. ހަމްދޫން ހަމްޒަތު އަދި އަލީ މިޖުވާދު މާލިކު އިބްރާހިމްގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދައުވާއެވެ. އަދި އިބްރާހިމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ޤާސްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.
ކްރިމިނަލް ކޯޓުން މިއަދު ހުކުމް ކޮށްފައިވަނީ އިބްރާހީމް ވިޝާމްގެ މައްޗަށް ކޮށްފައިވާ ތޫނު އެއްޗެއް ބޭނުންކޮށްގެން ޤާސްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާ ސާބިތުނުވާކަމަށެވެ.
މި މައްސަލައިގައި ދެން ދައުވާކުރި ދެ މީހުންގެ ބައި ކްރިމިނަލް ކޯޓުގައި ދަނީ ހިނގަމުންނެވެ. އެ ދެމީހުންގެ ބައި އޮތީ ހުކުމް ކުރުމުގެ މަރުޙަލާގައެވެ.
އާގީލް މަރާލި މައްސަލައިގައި ދައުވާ ކުރި މީހުންގެ ތެރެއިން އެކަކުގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމް ކުރުމުން، ޕްރޮސިކިއުޓާ ޖެނެރަލްގެ އޮފީހުން ބުނެފައިވަނީ އިބްރާހީމް ވިޝާމްގެ ބައިގެ ޙުކުމާއި، ޝަރީޢަތް ނިމުނު ގޮތުގެ ރިޕޯޓުތައް ލިބުމުން ދިރާސާކުރުމަށްފަހު މައްސަލަ އިސްތިއުނާފުކުރުމާމެދު ގޮތެއް ނިންމާނެ ކަމަށެވެ.
އާގީލް މަރުވެފައިވަނީ 31 އޯގަސްޓް 2018 ދުވަހުގެ 19:30 ހާއިރު މޯލްޑިވްސް މަނިޓަރީ އޮތޯރިޓީ އާއި ދިމާލުން ބޮޑުތަކުރުފާނުމަގުގައި ހުއްޓާ ބަޔަކުމީހުން ތޫނު އެއްޗަކުން ހަމަލާދީ މާރާމާރީ ހިންގުމުގެ ސަބަބުންނެވެ.