ފަލަސްތީނުގެ ގާޒާގެ ދެކުނުގައި އޮންނަ ރަފަހް ސިޓީއަށް އިޒްރޭލުން ދެމުންގެންދާ ހަމަލާތަކާ ގުޅިގެން 600،000 މީހުން އެ އަވަށް ދޫކޮށް ގޮސްފައިވާ ކަމަށް އ.ދ އިން ބުނެފި އެވެ.
އ.ދ ގެ ސެކެޓްރީ ޖެނެރަލްގެ ތަރުޖަމާނު ފަރްހާން ހައްގު ވިދާޅުވީ މި މަހުގެ 6 ވަނަ ދުވަހުން ފެށިގެން އިޒްރޭލުން ރަފަހްގައި ކުރިއަށްގެންދާ އަސްކަރީ އޮޕަރޭޝަނުގެ ސަބަބުން އިއްޔެގެ ނިޔަލަށް ރަފަހް ދޫކޮށް 600،000 މީހުން ގޮސްފައިވާ ކަމަށެވެ. އެގޮތުން ފާއިތުވި 48 ގަޑިއިރު ތެރޭ އެކަނި 150،000 މީހުން ރަފަހް ދޫކޮށް ގޮސްފައިވާ ކަމަށް ވިދާޅުވި އެވެ.
އިޒްރޭލުން މި މަހުގެ 6 ވަނަ ދުވަހުން ފެށިގެން ރަފާހް އަށް ބޮން އަޅަން ފަށާފައިވާއިރު އެގައުމުން މީގެކުރިން ވަނީ މިލިޓަރީ އޮޕަރޭޝަނެއް ފަށަން ބޭނުންވާތީ ރަފާހްގައި ދިރިއުޅެމުންދާ އެންމެން ވަޒަން ދޫކޮށް ދިޔުމަށް ވެސް އަންގާފަ އެވެ. ނަމަވެސް މިކަން މިގޮތަށް ނުކުރުމަށް އެތައް ގައުމަކުން އިޒްރޭލު ކިބައިން ވަނީ އެދިފަ އެވެ.
އިޒްރޭލުން ބުނީ ރަފާހް އަށް ދެމުންދާ ހަމަލާތައް އަމާޒުކުރަނީ ހަމާސް ޖަމާއަތުގެ ހަނގުރާމަވެރިން ތިބި ސަރަހައްދުތަކަށް ކަމަށެވެ. އަދި އެ ސަރަހައްދުތަކުން އާންމުން ފޭބުމަށް ވެސް އިޒްރޭލު ސިފައިން އަންނަނީ އަންގަމުންނެވެ. އިޒްރޭލުން ދެމުންދާ ހަމަލާތަކުގެ ރައްދުގައި ގާޒާގެ އެކި ސަރަހައްދުތަކުން އިޒްރޭލަށް އަމާޒުކޮށް ވެސް ވައިގެ ހަމަލާތަކެއް ވަނީ ފޮނުވާލާފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 34،000 އަށް ވުރެ މައްޗަށް އަރާފަ އެވެ.