އަނބިމީހާއަށް އަނިޔާކޮށް ދަރިފުޅު ގައިގާ ޖެހި މީހަކު ޖަލަށް ލުމަށް ހުކުމް ކޮށް، ރުޅިމަޑުކުރުމާ ގުޅޭ ތެރަޕީ ނެގުމަށް ކްރިމިނަލް ކޯޓުން ހުކުމް ކޮށްފިއެވެ.
މި މައްސަލައިގައި ދައުލަތުން ދައުވާ ކޮށްފައިވަނީ ކ. ކާށިދޫ، މަލަސް އިބްރާހިމް ސިރާޖުގެ މައްޗަށެވެ. އޭނާގެ މައްޗަށް ވަނީ ގައިގައި އަތްލުމުގެ ކުށުގެ ދެ ދައުވާއެއް ކޮށްފައެވެ. ފުރަތަމަ ދައުވާ ކޮށްފައިވަނީ 2020 ވަނަ އަހަރު އޭނާގެ ދަރިފުޅު ލައިގެން ހުރި ޓީޝާޓުގައި ހިފާ ދަމާ، ބުރަކަށްޓާ ދިމާލުން ވީދާލާ، ދަރިފުޅުގެ ބޮލުގެ ވާތްފަރާތުގައްޔާއި ކޯ މަތީގައި ދެފަހަރަކު ޖަހާފައިވާތީއެވެ. އަދި ދެވަނަ ދައުވާ ކޮށްފައިވަނީ 2020 ވަނަ އަހަރު އާނޭގެ އަނބިމީހާ ކޮށްޕާލުމުން ސިޑިމައްޗަށް ވެއްޓި އަނިޔާވެފައިވާތީއާއި އެކި ދުވަސް މަތިން ދަރިންގެ ކުރިމަތީގައި އަނބިމީހާއަށް އަނިޔާކޮށްފައިވާ މައްސަލައިގައެވެ.
ދައުލަތުން ކުރި މި ދެ ދައުވާއަށްވެސް އިބްރާހިމް ސިރާޖު ވަނީ އިންކާރުކޮށްފައެވެ. އެހެންކަމުން ދައުލަތުން ވަނީ މައްސަލަ ސާބިތު ކޮށްދިނުމަށް ހެކި ހުށަހަޅާފައެވެ. އަދި މައްސަލަ ބެއްލެވި ގާޒީ ނިންމަވާފައިވަނީ އިބްރާހިމް ސިރާޖުގެ މައްޗަށް ކުށް ސާބިތުވާ ކަމަށެވެ.
އެހެންކަމުން އަނބިމީހާއަށް އަނިޔާކުރި މައްސަލައިގައި އިބްރާހިމް ސިރާޖުގެ މައްޗަށް ވަނީ 2 މަހާ 21 ދުވަހުގެ ޖަލު ހުކުމެއް ކަނޑައަޅާ، އޭގެތެރެއިން ތަންފީޒު ކުރަންޖެހޭ އަދަބަކީ 1 މަހާ 29 ދުވަސް ކަމަށް ކަނޑައަޅާފައެވެ. މިގޮތަށް ކަނޑައަޅާފައިވަނީ އޭނާ މި މައްސަލައިގައި ފުލުހުންގެ ބަންދުގައި 22 ދުވަސް ހޭދަކޮށްފައިވާތީއެވެ.
މީގެއިތުރުން ދަރިފުޅަށް އަނިޔާކުރި މައްސަލައިގައި އިބްރާހިމް ސިރާޖުގެ މައްޗަށް ވަނީ 1 މަސް ދުވަހަށް ޖަލަށް ލުމަށް ހުކުމް ކޮށްފައެވެ. އަދި ރުޅި މައިތިރިކޮށް ރުޅިމަޑުކުރުމާ ގުޅޭ ފަރުވާ ދިނުމުގެ ހުއްދަ ސަރުކާރުން ލިބިފައިވާ ކައުންސިލަރެއްގެ ފަރާތުން 40 ގަޑިއިރުގެ ކައުންސިލިން ހޯދުމަށްވެސް އަމަރުކޮށްފައިވެއެވެ.