ލޯކަލް ކައުންސިލްތަކަށް ދޭން ނިންމާފައިވާ ބްލޮކް ގްރާންޓް ވީހާ ވެސް އަވަހަށް ލިބޭނެ ގޮތް ހަމަޖައްސައިދިނުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން އެދިއްޖެއެވެ.
އެލްޖީއޭއިން ފިނޭންސް މިނިސްޓަރު ޑރ. މުހައްމަދު ޝަފީގަށް ފޮނުވި ސިޓީއެއްގައި ބުނެފައިވަނީ ކައުންސިލްތަކަށް މަހުން މަހަށް ޖަމާވާ ބްލޮކް ގްރާންޓް ޖަމާވުން ލަސްވާތީ ކައުންސިލްތަކުން ކަންބޮޑުވުންފާޅު ކުރަމުންދާ ކަމަށެވެ.
އެލްޖީއޭއިން ބުނެފައިވަނީ ކައުންސިލްތަކުން މަހުން މަހަށް ދޭންޖެހޭ މުސާރަ އަދި އެހެނިހެން ހަރަދުތައް ހަމަޖައްސަނީ ބްލޮކް ގްރާންޓުގެ ތެރެއިން ކަމަށެވެ. އެހެންކަމުން ބްލޮކް ގްރާންޓު ޖަމާވުން ލަސްވާނަމަ އެކަންކަމުގައި ހުރަސްތަކާ ކުރިމަތިވާކަން ފާހަގަކޮށްފައިވެއެވެ.
އެލްޖީއޭއިން ފޮނުވި ސިޓީގައި އެދިފައިވަނީ ވީހާވެސް އަވަހަކަށް ފިނޭންސް މިނިސްޓްރީން ކައުންސިލްތަކަށް ބްލޮކް ގްރާންޓު ޖަމާކޮށްދިނުމަށެވެ. އަދި އެއްވެސް ސަބަބަކާ ހުރެ ބްލޮކް ގްރާންޓު ހިފަހައްޓާނަމަ، އެސަބަބެއް އެލްޖީއޭއަށާއި އެ ކައުންސިލަކަށް އެނގޭނެ އިންތިޒާމު ހަމަޖައްސައި ދިނުމަށްވެސް އެދިފައިވެއެވެ.
ދައުލަތުގެ ބަޖެޓުން ކައުންސިލްތަކަށް ބްލޮކް ގްރާންޓްގެ ގޮތުގައި ފައިސާ ޖަމާކުރަންފެށި 2020 ވަނަ އަހަރުއެވެ.