މިއަހަރު މިހާތަނަށް ރާއްޖެ ޒިޔާރަތްކުރި ޗައިނާގެ ފަތުރުވެރިންގެ އަދަދު 92،000 އަށްވުރެ މައްޗަށް ގޮސްފިއެވެ.
ޓޫރިޒަމް މިނިސްޓްރީން ހާމަކުރަމުން އަންނަ ތަފާސްހިސާބު ދައްކާގޮތުން މޭ މަހުގެ ފުރަތަމަ 14 ދުވަހު ރާއްޖެ އައިސްފައިވަނީ 61،0777 ފަތުރުވެރިންނެވެ. މިއަހަރު މިހާތަނަށް ރާއްޖެއަށް ވަނީ 833،728 ފަތުރުވެރިން ޒިޔާރާތް ކޮށްފައެވެ.
ރާއްޖެއަށް މިހާތަނަށް އެންމެ ގިނަ ފަތުރުވެރިން ޒިޔާރާތް ކޮށްފައިވަނީ ޗައިނާއިންނެވެ. އެގައުމުން މިހާތަނަށް 92،773 ފަތުރުވެރިން ޒިޔާރާތް ކޮށްފައިވެއެވެ. ދެވަނައަށް އެންމެ ގިނަ ފަތުރުވެރިން ޒިޔާރާތް ކޮށްފައިވަނީ ރަޝިޔާއިންނެވެ. ތިން ވަނައަށް އެންމެ ގިނަ ފަތުރުވެރިން އިނގިރޭސިވިލާތުން ޒިޔާރާތްކުރިއިރު ދެން އެންމެ ގިނައިން ފަތުރުވެރިން ޒިޔާރާތް ކޮށްފައިވަނީ އިޓަލީ، ޖަރުމަނު، އިންޑިއާ، ފްރާންސް، އެމެރިކާ، ސްވިޓްޒަލޭންޑް އަދި ޕޮލެންޑުންނެވެ.
މިހާރު އެންމެގިނައިން ފަތުރުވެރިން އަންނަ ޗައިނާއަކީ މިދިޔަ އަހަރު ތިން ވަނަ އަށް އެންމެ ގިނަ ފަތުރުވެރިން ޒިޔާރާތްކުރި ގައުމެވެ. އަދި މިދިޔަ އަހަރު އެންމެ ގިނައިން ފަތުރުވެރިން ޒިޔާރާތްކުރި އިންޑިއާ އަދި އޮތީ 6 ވަނައިގައެވެ.