އަންނަ މަހު ބެލުންތެރިންނަށް ދޫކޮށްލަން ހަމަޖެހިފައިވާ ފިލްމު "ޗަންދޫ ޗެމްޕިއަން" ގައި އެކްޓަރު ކާތިކް އާރިއަންގެ ހަށިގަނޑުން ފެންނާނެ ބޮޑު ދެ ބަދަލެއް، ފިލްމުގެ ދެ ޕޯސްޓަރަކުން ދައްކާލައިފި އެވެ.
މީގެ ތެރެއިން އެއް ޕޯސްޓަރު ފެންނަނީ ވަރަށް އަނަރޫފަ ހަށިގަނޑަކާ އެކީ ކާތިކް ދުވާ ތަނެވެ. އަނެއް ޕޯސްޓަރުގައި ފެންނަނީ ވަރުގަދަ ހަށިގަނޑަކާ އެކީ ބޮކްސިން ރިންގްގައި އޭނަ އުޅޭ ތަނެވެ. "ޗަންދޫ ޗެމްޕިއަން" ގެ ޑައިރެކްޓަރު ކަބީރް ސިންގް ބުނި ގޮތުގައި މި ފިލްމަށް ކާތިކް ހަށިގަނޑަށް ގެނައި ޓްރާންސްފޮމޭޝަނަކީ ބޭހާ ނުލައި، ބުރަކޮށް މަސައްކަތްކޮށްގެން ކުރި މަސައްކަތުގެ ނަތީޖާ އެވެ.
ކާތިކް ވެސް ދާދި ބުނެފައި ވަނީ އަންނަ މަހުގެ 14 ގައި ސިނަމާތަކަށް ގެންނަން ހަމަޖެހިފައިވާ "ޗަންދޫ ޗެމްޕިއަން" އަކީ ފިލްމުގައި ކުޅެން ޖެހުނު ކެރެކްޓާ އަށް އޭނަ ވި ގުރުބާނީ ހަށިގަނޑުން ވެސް ދައްކުވައި ދޭނެ ފިލްމެއް ކަމަށެވެ. މި ބައޮގްރަފިކަލް ސްޕޯޓްސް ޑްރާމާގައި ހުނަރުވެރި އެކްޓަރު ކުޅެފައި ވަނީ ޕެރަލިމްޕިކްގައި ރަން މެޑެލް ހޯދާފައިވާ ކުރީގެ އެތުލީޓް މުރްލީކަންތު ޕެޓްކަރްގެ ރޯލެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ޗަންދޫ ޗެމްޕިއަން" އަކީ ސާޖިދު ނަދިއަދުވާލާ ޕްރޮޑިއުސްކުރި ފިލްމެކެވެ.
"ސޯނޫ ކޭ ޓިޓޫ ކީ ސްވީޓީ" އާއި "ޕިޔާރު ކާ ޕަންޗްނާމާ" އާއި "ލުކާ ޗުއްޕީ" އާއި "ސަތިއަޕްރޭމް ކީ ކާތާ" ގެ އިތުރުން "ފްރެޑީ" ފަދަ މަގުބޫލު ފިލްމުތައް ކުޅުނު ކާތިކްގެ އެންމެ ފަހުގެ ފިލްމަކީ މިދިޔަ އަހަރު ފިނި ތަރުހީބެއް ލިބުނު "ޝެހެޒާދާ" އެވެ.
"ޗަންދޫ ޗެމްޕިއަން" ގެނެސްދޭން ގާތްވަމުން އަންނަ އިރު، މީގެ ޑައިރެކްޓަރު ކަބީރްގެ އެންމެ ފަހުގެ ފިލްމަކީ ރަންވީރު ސިންގްއާ އެކީ 2021 ގައި ގެނެސްދިން ކްރިކެޓް ފިލްމު "83" އެވެ. ކަބީރަކީ "އޭކް ތަ ޓައިގާ" އާއި "ބަޖްރަންގީ ބައިޖާން" ފަދަ ކާމިތާބު ފިލްމުތައް ގެނެސްދިން ޑައިރެކްޓަރެވެ.