ރާއްޖެއިން ފުރަތަމަ ފަހަރަށް އޮލިމްޕިކްސްއަށް ކޮލިފައިވި އެތުލީޓު، ފާތިމަތު ދީމާ އަލީއަށް މަރުޙަބާ ކިޔުމުގެ ގޮތުން މިއަދު ހާއްސަ އިވެންޓެއް ބާއްވަން ނިންމައިފި އެވެ.
މި އިވެންޓް އިންތިޒާމު ކުރަނީ ސްޕޯޓްސް މިނިސްޓްރީންނެވެ. އެ މިނިސްޓްރީން ބުނީ ދީމާގެ ކާމިޔާބީ ފާހަގަކޮށް މަރުޙަބާ ކިޔުމުގެ ގޮތުން މިއަދު މެންދުރު ފަހު 2:00 ގައި ސޯޝަލް ސެންޓަރުގައި ހާއްސަ ހަރަކާތެއް ކުރިއަށް ގެންދަން ނިންމާފައިވާ ކަމަށެވެ. އެހެންވެ ވީހާ ވެސް ގިނަ ބަޔަކު ރަތް ކުލައިގެ ހެދުމުގައި ދީމާއަށް މަރުޙަބާ ކިޔުމުގައި ބައިވެރިވުމަށް މިނިސްޓްރީން އެދިފައިވެ އެވެ.
ރާއްޖޭގެ ޓީޓީގެ އެންމެ ވިދުން ގަދަ އަންހެން ތަރީގެ ގޮތުގައި މިހާރު ފާހަގަކުރެވޭ ދީމާގެ މި އަހަރު ފްރާންސްގައި ބާއްވާ އޮލިމްޕިކްސްއަށް ކޮލިފައިވީ ނޭޕާލުގައި ކުރިއަށް ދިޔަ ދެކުނު އޭޝިއާ ސަރަހައްދުގެ ކޮލިފިކޭޝަންގެ ސިންގަލްސް ބައިން ޗެމްޕިއަންކަން ހޯދައިގެންނެވެ. މިއީ ރާއްޖޭގެ ކުޅިވަރު ތާރީހުގައި އޮލިމްޕިކްސް އަށް ކޮލިފައިވި ފުރަތަމަ ދިވެހި އެތުލީޓެވެ.
އެ ޝަރަފު ދީމާ ހޯދުމާ ގުޅިގެން ވަރަށް ގިނަ ބަޔަކު އަންނަނީ ސޯޝަލް މީޑިއާގައި ދިމާ އަށް މަރުހަބާ ކިޔަމުންނެވެ.