ފްރާންސްގައި މިހާރު ކުރިއަށްދާ މި އަހަރުގެ ކާންސް ފިލްމު ފެސްޓިވަލްގައި އިންޑިއާގެ ބަތަލާ އައިޝްވާރިއާ ރާއީގެ ފުރަތަމަ ފެނިލުން ދައްކާލައިފި އެވެ.
ރެޑް ކާޕެޓްމަތިން އައިޝްވާރިއާ މީޑިއާތަކާ ބައްދަލުކުރީ ޕްލާސްޓަރު އަޅާފައިވާ އަތަކާ ވެސް އެކީގަ އެވެ. އޭނަގެ ކަނާތް ބިންދައިގެން ގޮސްފައިވާތީ ޕްލާސްޓަރު އަޅާފައި އިރު، ރެޑް ކާޕެޓްގައި ބޭނުން ކުރި ހެދުމުގައި ވެސް ޕްލާސްޓަރާ އެއްގޮތަށް ހުދު ކުލަ ހިމެނެ އެވެ. މައިގަނޑުކޮށް ކަޅު ކުލަ ހިމެނޭ ހެދުމުގެ ފުއްޕި ދެ އަތް ހުދު ކުލައިން ހުރި އިރު، ރަން ކުލައިގެ ޑިޒައިންތަކަކާއި އަދި އެ ކުލައިގެ މާތަކެއް ޖެހި ދިގު ފަސްބައެއް ހެދުމުގައި ހިމެނެ އެވެ.
އައިޝްވާރިއާ އަކީ އިންޑިއާގެ ފިލްމީ ތަރިންގެ ތެރެއިން ކޮންމެ އަހަރަކު ވެސް ކާންސް އިން ފެންނަ އެންމެ އާންމު މޫނެވެ. މިހާރު ވަރަށް މަދުން ނޫނީ ފިލްމުތަކުން ނުފެންނަ ކުރީގެ މިސް ވޯލްޑްގެ އެންމެ ފަހުގެ ފިލްމަކީ މިދިޔަ އަހަރުގެ ކުރީކޮޅު ރިލީޒްކުރި ތަމަޅަ ފިލްމު "ޕޮނިޔިން ސެލްވަމް 2" އެވެ.
މި މަހުގެ 14 ގައި ފެށި 77 ވަނަ ކާންސް ފިލްމު ފެސްޓިވަލް މި މަހުގެ 25 އާ ހަމައަށް ކުރިއަށް ދާނެ އެވެ.