އެމެރިކާގެ ލަސް ވެގަސްގެ މަޝްހޫރު "ދަ މިރާޖް ހޮޓެލް އެންޑް ކެސިނޯ" ރިސޯޓް ވަގުތީ ގޮތުން ބަންދުކުރަން ނިންމައިފި އެވެ.
ތިން އަހަރަށް ދެމިގެންދާ ގޮތަށް ކުރިއަށް ގެންދަން ހަމަޖެހިފައިވާ މަރާމާތުގެ މަސައްކަތްތްތަކަށް އެތަނުގެ އޮޕަރޭޝަން ހުއްޓާލަން ނިންމާފައި ވަނީ އަންނަ ޖުލައި މަހުގެ 17 ގަ އެވެ. މިއީ އޮޕަރޭޝަނަށް ގެނައިތާ 34 އަހަރު ފަހުން "ދަ މިރާޖް" ގެ ބަންދުކުރާ ފުރަތަމަ ފަހަރެވެ. މި ވާހަކަ އެތަނުގެ ފޭސްބުކް ޕޭޖްގައި ވެސް ހިއްސާކޮށް، މިހާތަނަށް ހިދުމަތް ހޯދި ހުރިހާ ކަސްޓަމަރުންނަށް ޝުކުރު ވެސް އަދާކޮށްފައިވެ އެވެ.
ޓްރޮޕިކަލް ތީމަކަށް ހާޑް ރޮކް އިންޓަނޭޝަނަލް އިިން އޮޕަރޭޓް ކުރަމުން އަންނަ މި ރިސޯޓަކީ 3،044 ކޮޓަރީގެ ތަނެކެވެ. "ދަ މިރާޖް" ހުޅުވީ ނޮވެމްބަރު 22، 1989 ގަ އެވެ.
މަރާމާތަށް ބަންދުކުރުމަށް ފަހު 2027 ގައި ތަން އަލުން ހުޅުވަން ނިންމާފައި ވަނީ "ހާޑް ރޮކް ލަސް ވެގަސް" ގެ ނަމުގަ އެވެ. ހާޑް ރޮކުން "ދަ މިރާޖް" ގަތީ 2022 ގަ އެވެ. އެއީ ބިލިއަން ޑޮލަރަށް ވުރެ ބޮޑު އަގަކަށެވެ. އެ ކުންފުންޏަށް އެތަން ވިއްކީ އެމްޖީއެމުންނެވެ.
އެމްޖީއެމަށް "ދަ މިރާޖް" ވިއްކީ އެތަނުގެ ވެރިޔާ މަހުޖަނު ސްޓީވް ވީން، 2000 ވަނަ އަހަރު އެވެ.