އިންޑިއާގެ މަޝްހޫރު އެކްޓަރު ރަންވީރު ސިންގް އަންނަ މަހުގެ ތެރޭގައި އާ ފިލްމެއްގެ ޝޫޓިން ފަށަން ހަމަޖެހިފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ މިއީ ޑައިރެކްޓަރު އަދިތިޔާ ދާރް ހަދަން ނިންމާފައިވާ ފިލްމެއް ކަމަށެވެ. މި ގޭންގްސްޓާ ޑްރާމާގެ ނަމަކީ "ދުރަންދާރް" އެވެ. މިއީ ބޮޑު ބަޖެޓަކުން ވެސް ހަދަން ނިންމާފައިވާ ފިލްމެއް ކަމަށާއި ފިލްމަކީ ވަރަށް ހާއްސަ ފިލްމަކަށް ވާނެ ކަމަށް ބުނެފައިވެ އެވެ. ނަމަވެސް "ދުރަންދާރް" އާ ބެހޭ އިތުރު ތަފުސީލުތަކެއް އަދި ނުލިބެ އެވެ.
އަދިތިޔާ އަކީ ބަތަލާ ޔާމީ ގޯތަމްގެ ފިރިމީހާ އެވެ. އޭނަ އެންމެ ފަހުން ޑައިރެކްޓްކުރި ފިލްމަކީ ވިކީ ކޯޝަލާ އެކީ 2019 ގައި ގެނެސްދިން ކާމިޔާބު ވަތަނީ ފިލްމު "އުރީ: ދަ ސާޖިލަލް ސްޓްރައިކް" އެވެ.
މަޝްހޫރު ބަތަލާ ދީޕިކާގެ ފިރިމީހާ ރަންވީރު ސޮއިކޮށްފައިވާ ފިލްމުތަކުގެ ތެރޭގައި ޑައިރެކްޓަރު ފަރުހާން އަޚްތަރުގެ "ޑޮން 3" އާއި ދެކުނުގެ ޑައިރެކްޓަރު ޕްރަޝާންތު ވަރުމާގެ "ރަކްޝަސް" ހިމެނެ އެވެ. ރަންވީރުގެ އެންމެ ފަހުގެ ފިލްމަކީ ކަރަން ޖޯހަރްގެ މިދިޔަ އަހަރުގެ "ރޮކީ އޯރް ރާނީ ކޯ ޕްރޭމް ކަހާނީ" އެވެ.
މި އަހަރުގެ އޮގަސްޓްގައި ރިލީޒްކުރަން ހަމަޖެހިފައިވާ އަޖޭ ދޭވްގަންގެ "ސިންގަމް އެގެއިން" ގެ ހާއްސަ ރޯލަކުން ރަންވީރު ފެންނާނެ އެވެ. އޭނަގެ އަންހެނުން ދީޕިކާ ވެސް ކާސްޓްގައި ހިމެނޭ މި ފިލްމަކީ ޑައިރެކްޓަރު ރޯހިތު ޝެޓީގެ ފިލްމެކެވެ.