މި ފަހުން ރާއްޖެއާ ދެމެދު އުފެދިފައިވާ ނުތަނަވަސްކަން އެއްކޮށް ނައްތައިލެވޭނެކަމުގެ އުންމީދު ބޮޑު ކަމަށް އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖެއިޝަންކަރް ވިދާޅުވެއްޖެ އެވެ.
އާންމު ފޯރަމެއްގެ ތެރޭގައި ކުރިމަތިވި ސުވާލެއްގެ ޖަވާބުގައި އޭނަ ވިދާޅުވީ ސިޔާސީ ގޮތުން ދެ ގައުމުގެ މެދުގައި ހުރި ނުތަނަތަސްކަމާ ބެހޭ ގޮތުން ދާދި ފަހުން މަޝްވަރާތަކެއް ވެސް ކުރެވުނު ކަމަށެވެ. ޖެއިޝަންކަރު އިޝާރާތް ކުރެއްވި އެ މަޝްވަރާ އަކީ މީގެ ހަފުތާއެެއްހާ ދުވަސް ކުރިން ރާއްޖޭގެ ފޮރިން މިނިސްޓަރު މޫސާ ޒަމީރު އިންޑިއާ އަށް ކުރެއްވި ރަސްމީ ދަތުރުގެ ތެރޭގައި ކުރެވުނު މަޝްވަރާ އެވެ.
"އެ ބައްދަލުވުމަށް ފަހު ދެ ގައުމުގެ މެދުގައު ހުރި ނުތަނަވަސްކަން މިހާރު ކުޑަ ވެސް ވެއްޖެ." ޖެއިޝަންކަރް ވިދާޅުވި އެވެ.
EAM Jaishankar says development projects with Maldives going well, things are constructive pic.twitter.com/ptBrm0oB97
— Sidhant Sibal (@sidhant) May 17, 2024
އޭނަ ވިދާޅުވީ އިންޑިއާގެ އެހީގައި ރާއްޖޭގައި ކުރިއަށްދާ ތަރައްގީގެ މަޝްރޫއުތައް ރަނގަޅަށް ކުރިއަށްދާ ކަމަށެވެ. އިންޑިއާގެ އެހީގައި ރާއްޖޭގައި މިހާރު ކުރިއަށްދާ އެންމެ ބޮޑެތި މަޝްރޫއުތަކުގެ ތެރޭގައި ހިމެނެނީ ތިލަމާލެ ބްރިޖާއި އައްޑޫގެ މަގު ހެދުމުގެ މަޝްރޫއު އެވެ.
ރާއްޖެ އިން އަބަދު ވެސް އެންމެ ގާތް ގުޅުމެއް ބާއްވަމުން އަންނަ އެންމެ އަވައްޓެރި ގައުމުގެ ގޮތުގައި ފާހަގަކޮށްލެވޭ އިންޑިއާއާ އެކީ އޮތް ގުޅުމަށް ބުރޫތަކެއް އެރީ މިހާރުގެ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތް ހިސާބުންނެވެ. އެގޮތުން ރާއްޖޭގައި ތިބި އިންޑިއާ ސިފައިން ބާލަން ނިންމުމުގެ އިތުރަށް ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާއަށާއި އެ ގައުމުގެ ބޮޑުވަޒީރު ނަރެންދުރަ މޯދީ އަށް ކުޑައިމީސްކޮށް ސޯޝަލް މީޑިއާގައި ދެއްކި ވާހަކަތަކަކާ ގުޅިގެން ދެ ގައުމުގެ ގުޅުމަށް ވަރަށް ބޮޑު ނުތަނަސްކަމެއް ވެރިވި އެވެ.
މިކަމާ ހެދި އިންޑިއާގެ ޓޫރިސްޓުން ރާއްޖެ ނުދާން ގޮވާލައި އިންޑިއާގައި އެންޓި-ކެމްޕޭންތަކެއް ވެސް ކޮށްފައިވެ އެވެ. އިންޑިއާ އަކީ މިދިޔަ އަހަރު ރާއްޖެ އަށް އެންމެ ގިނަ ޓޫރިސްޓުން އައި ގައުމެވެ. ސަރުކާރުން މިހާރު ތަކުރާރުކޮށް ބުނަމުން އަންނަނީ އިންޑިއާ މާކެޓް ރާއްޖެ އަށް ވަރަށް މުހިއްމު ކަމަށާއި އިންޑިއާގެ ޓޫރިސްޓުންނަށް އަބަދު ވެސް މަރުހަބާ ކިޔާނެ ކަމަށެވެ.
އިންޑިއާ އަކީ އެތައް ގޮތަކުން އަބަދު ވެސް ރާއްޖެ އަށް އެހީވަމުން އަންނަ ގައުމެކެވެ.