ފުޓްބޯޅައިގެ ހަރަކާތްތަކުން އިޒްރޭލް ސަސްޕެންޑް ކުރުމާ މެދު ވަރަށް އަވަހަށް ގޮތެއް ނިންމާނެ ކަމަށް ދުނިޔޭގެ ފުޓްބޯޅައިގެ މައި އިދާރާ ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެ އެވެ.
އޭނަ އެގޮތަށް ވިދާޅުވީ އިއްޔެ ބޭންކޮކްގައި ފެށި ފީފާގެ ކޮންގްރެސްގަ އެވެ. އޭގައި ވާހަކަ ދައްކަވަމުން އިންފަންޓޯނީ ވިދާޅުވީ އިޒްރޭލު ފުޓްބޯލް އެސޯސިއޭޝަން (އައިއެފްއެފް) ސަސްޕެންޑްކުރުމާ މެދު ކުރިއަށް ދެ މަހުގެ ތެރޭގައި ހާއްސަ ކައުންސިލް ބައްދަ،ުވުމެއް ބާއްވައި ގޮތެއް ނިންމާނެ ކަމަށެވެ.
އޭނަ އެގޮތަށް ވިދާޅުމުގެ ކުރިން ފަލަސްތީނިއަން ފުޓްބޯލް އެސޯސިއޭޝަން (ޕީއެފްއޭ) އިން ވަނީ އިޒްރޭލު ސަސްޕެންޑްކުރަން ގޮވާލައިފަ އެވެ. އެ ޖަމިއްޔާ އިން ބުނެފައި ވަނީ އިޒްރޭލުން ދަނީ ފަލަސްތީނާ ދެކޮޅަށް ހިންގަމުންދާ ލާއިންސާނީ ގަތުލުއާންމުގައި ފީފާގެ އުސޫލުތަކާ ވެސް ހިލާފުވަމުން ކަމަށެވެ.
އެހެންވެ ބައިނަލްއަގުވާމީ ފުޓްބޯޅައިގެ ހުރިހާ ހަރަކާތްތަކަކުން އިޒްރޭލު ސަސްޕެންޑް ކުރަން ޕީއެފްއޭ އިން ފީފާ އަށް ގޮވާލައިފަ އެވެ.
އެކަމާ ގުޅިގެން އިންފަންޓީނޯ ވިދާޅުވީ އިޒްރޭލަށް ފިޔަވަޅު އެޅުމާ ގުލޭ ގޮތުން އަންނަ ޖުލައި މަހުގެ 20 ގައި ބާއްވާ ކައުންސިލް ބައްދަލުވުމުުގައި ގޮތެއް ނިންމާނެ ކަމަށެވެ.
"އެހެންވީމާ މިކަމާ ގުޅޭ ގޮތުން އަހަރެމެން ގާނޫނީ ގޮތުން ހޯދަން ޖެހޭ ލަފާ ވެސް ހޯދާނަން." އޭނަ ވިދާޅުވި އެވެ.
މިދިޔަ އަހަރުގެ އޮކްޓޯބަރު 7 އިން ފެށިގެން އިޒްރޭލުން ފަލަސްތީނުގައި ހިންގަމުންދާ ޖަރީމާތަކާ ގުޅިގެން ބައިނަލްއަގުވާމީ ދުނިޔޭގެ ރުޅިވެރިކަމާއި ނަފުރަތު އިޒްރޭލަށް އަމާޒުވެފައިވެ އެވެ.