ރާއްޖެ އަށް ހަދިޔާކޮށްފައިވާ ހެލިކޮޕްޓަރުތަކާއި ޑޯނިއާ މަތިންދާބޯޜް ދުއްވާނެ ޕައިލެޓުން ތަމްރީނުކޮށް ދޭން ރާއްޖެ އިން އެދިއްޖެ ނަމަ އެކަން،ކޮށް ދޭން ތައްޔާރަށް އޮތް ކަމަށް އިންޑިއާ އިން ބުނެފި އެވެ.
އެ ގައުމުގެ އެކްސްޓާނަލް އެފެއާޒް މިނިސްޓްރީން ކޮންމެ ހަފުތާއަކު ބާއްވަމުން އަންނަ ނޫސްވެރިންގެ ބައްދަލުވުމުގައި އެ މިނިސްޓްރީގެ ތަރުޖަމާނު ރަންދީރް ޖައިސްވާލް އިއްޔެ ވިދާޅުވީ ދިފާއީ ދާއިރާ އިން ރާއްޖެ އާއި އިންޑިއާއާ ދެމެދު ސޮއިކޮށްފައިވާ އެއްބަސްވުންތަކުގައި ރާއްޖޭގެ ދިފާއީ ދާއިރާ ވަރުގަދަކުރުމަށް އެހީތެރިވުމާއި ގާބިލުކަން އިތުރުކުރަން މަސައްކަތް ކުރުން ހިމެނޭ ކަމަށެވެ. އެހެންވެ އިންޑިއާ އިން ހަދިޔާކޮށްފައިވާ އުޅަނދުތައް ދުއްވުމަށް ދިވެހި ސަރުކާރުން އެދިއްޖެ ނަމަ ދިވެހިން ތަމްރީންކޮށް ދޭނެ ކަމަށް ވިދާޅުވި އެވެ.
"އިންޑިއާ އޮންނާނީ ރާއްޖެ އިން އެދިއްޖެ ހާލަތެއްގައި އެކަން ކޮށް ދޭން ތައްޔާރަށް." ޖައިސްވާލް ވިދާޅުވި އެވެ.
އިންޑިއާ އިން ރާއްޖެއަށް ހަދިޔާކޮށްފައި ވަނީ ދެ ހެލިކޮޕްޓާއި ޑޯނިއާ ބޯޓެވެ. އެ ތަކެތީގެ އޮޕަރޭޝަނަށާއި މެއިންޓަނަންސަށް މިހާތަނަށް ރާއްޖޭގައި އިންޑިއާ ސިފައިން ތިބި ނަމަވެސް، ޑރ. މުހައްމަދު މުއިއްޒުގެ ސަރުކާރުން ވަނީ އިންޑިއާ ސިފައިން އަނބުރާ ފޮނުވާލައިފަ އެވެ.
އަދި ސިފައިންގެ ބަދަލުގައި އެ އުޅަނދުތަކުގެ ކަންކަމުގައި މިހާރު ހަރަކާތްތެރި ވަނީ ސިވިއަނުން ކަމަށް ސަރުކާރުން ބުނެފައިވެ އެވެ.