ވިއެޓްނާމްގެ ޕަބްލިކް ސެކިއުރިޓީ މިނިސްޓަރުގެ މަގާމުގައި ހުންނެވި ޓޯ ލަމް ރައީސްގެ މަގާމަށް އައްޔަންކުރަން ނިންމައިފި އެވެ.
އެ ގައުމުގެ ވެރިކަން ކުރާ ކޮމިއުނިސްޓް ޕާޓީން ޓޯ، 66، ރައީސްގެ މަގާމަށް ގެންނަން ނޮމިނޭޓްކުރީ އިއްޔެ އެވެ. ޕަބްލިކް ސެކިއުރިޓީ މިނިސްޓަރުގެ މަގާމު އޭނަ އަދާކުރައްވަމުން ގެންދަވަނީ 2016 އިން ފެށިގެންނެވެ.
ވިއެޓްނާމަށް އާ ރައީސަކު އައްޔަންކުރަން ނިންމީ އެ މަގާމުގައި ކުރިން ހުންނެވި ވޯ ވަން ތުއަންގްގެ މައްޗަށް ކުރެވިފައިވާ ކޮރަޕްޝަންގެ ތުހުމަތުތަކާ ހެދި މިދިޔަ މާޗް މަހުގެ އިސްތިއުފާ ދެއްވުމާ ގުޅިގެންނެވެ. މިއީ ފާއިތުވި ދެ އަހަރުގެ ތެރޭގައި ކޮޕަރްޝަންގެ ތުހުމަތުތަކާ ހެދި އިސްއުފާ ދެއްވި ވިއެޓްނާމްގެ ދެވަނަ ރައީސެވެ.
އާ ރައީސަކަށް ވެރިކަންކުރާ ޕާޓީން ލަމް ނޮމިނޭޓްކުރުމާ ގުޅިގެން މިކަމާ ވިއެޓްނާމުގެ ގާނޫނު ހަދާ މަޖިލީހުން އަންނަ ހަފުތާގެ ތެރޭގައި ގޮތެއް ނިންމާނެ އެވެ.