ބޮލީވުޑްގެ މަޝްހޫރު ދެމަފިރިން ކަމަށްވާ ރަންބީރް ކަޕޫރާއި އާލިއާ ބަޓް އެކީގައި ކުޅެން ހަމަޖެހިފައިވާ ދެވަނަ ފިލްމު "ލަވް އެންޑް ވޯ" ގެ ޝޫޓިން ފަށާނީ މި އަހަރުގެ ނޮވެމްބަރު މަހުގެ ތެރޭގައި ކަމަށް ރިޕޯޓްތައް ބުނެފި އެވެ.
ބޮލީވުޑް ލައިފުން ބުނީ ސަންޖޭ ލީލާ ބަންސާލީ ޑައިރެކްޓްކުރަން ހަމަޖެހިފައިވާ ފިލްމުގެ ތައްޔާރީތައް މިހާރު ކުރިއަށްދާ ކަމަށެވެ. އަންނަ އަހަރުގެ ޑިސެމްބަރު މަހުގެ ތެރޭގައި ސިނަމާތަކަށް ގެންނަން ޕްލޭންކޮށްފައިވާ މި ފިލްމުގެ ކާސްޓްގައި ރަންބީރްގެ ކުރީގެ ލޯބިވެރިޔާ ބަތަލާ ކެޓްރީނާ ކެޓްރީނާގެ ފިރިމީހާ ވިކީ ކޯޝަލް ވެސް ހިމެނެ އެވެ.
ރަންބީރާއި އާލިއާގެ ފުރަތަމަ ފިލްމަކީ 2022 ގެ "ބުރައްމަސްތުރާ" އެވެ.
ދެ ތަރިން "ލަވް އެންޑް ވޯ" އަށް ތައްޔާރުވާ އިރު، ރަންބީރް މިހާރު އަންނަނީ ޑައިރެކްޓަރު ނިތޭޝް ތިވާރީގެ "ރާމާޔަން" ގެ މަސައްކަތް ކުރަމުންނެވެ. އަހަރުގެ ފަހުކޮޅަށް "ލަވް އެންޑް ވޯ" ގެ ޝޫޓިން ފަށަން ތާވަލުކޮށްފައިވާ އިރު، އާލިއާ ސޮއިކޮށްފައި އޮތް ޔާޝްރާޖް ފިލްމްސް (ވައިއާރްއެފް) ގެ ސްޕައި-ޔުނިވާސްގެ ފިލްމުގެ ޝޫޓިން ވެސް ފަށަން އޮތީ އަހަރުގެ ފަހުކޮޅު އެވެ.
އާލިއާގެ ކުރިއަށް އޮތް ފިލްމަކީ މި އަހަރުގެ ސެޕްޓެމްބަރުގައި ގެނެސްދޭން ހަމަޖެހިފައިވާ "ޖިގްރާ" އެވެ. މިއީ ޝޫޓިން ނިންމައި ޕޯސްޓް-ޕްރޮޑަކްޝަން މަރުހަލާގައި އޮތް ފިލްމެކެވެ.
"ލަވް އެންޑް ވޯ" އަކީ 2022 ގެ "ގަންގޫބާއީ ކަތިއަވާޅީ" އަށް ފަހު ބަންސާލީއާ އެކީ އާލިއާ މަަސައްކަތްކުރާ ދެވަނަ ފިލްމެވެ. އެ ފިލްމުން އޭނަ އަށް މޮޅު ބަތަލާގެ ނެޝަނަލް އެވޯޑް ވެސް ލިބިފައިވެ އެވެ. ރަންބީރް ބޮލީވުޑަށް ނުކުތީ ބަންސާލީގެ 2007 ގެ "ސާވަރިއާ" އިންނެވެ.
"ލަވް އެންޑް ވޯ" ވާނީ ނެޝަނަލް އެވޯޑް ހޯދާފައިވާ ވިކީ، ބަންސާލީއާ އެކީ މަސައްކަތް ކުރާ ފުރަތަމަ ފިލްމަށެވެ.