އަލަތު ވެބް ސީރީޒް "ހީރާމަންޑީ: ދަ ޑައިމަންޑް ބާޒާރު" އަށް ލިބެމުން އަންނަ ތަރުހީބާ މެދު ވަރަށް އުފާކުރާ ކަމަށާއި އެކަމަކު އޭގެ ދެވަނަ ސީޒަނެއް ގެނެސް ދިނުމާ މެދު ގޮތެއް ނިންމާނީ ނެޓްފްލިކްސް އިން ކަމަށް ޑައިރެކްޓަރު ސަންޖޭ ލީލާ ބަންސާލީ ބުނެފި އެވެ.
ބޮލީވުޑް ހަންގާމާ އަށް ދިން އިންޓަވިއުއެއްގައި އޭނަ ބުނީ ޝޯގެ ޕްރޮޑިއުސަރަކީ އެއީ ކަމަށާއި ނެޓްފްލިކްސް އަކީ ފާއިތުވި 30 އަހަރުގެ ތެރޭގައި އެކީގައި މަސައްކަތް ކުރެވުނު އެންމެ ހިތްހަމަޖެހޭ ޕްރޮޑިއުސަރު ކަމަށެވެ. "ހީރާމަންޑީ" ގެ ދެވަނަ ސީޒަނެއް ފެނިދާނެތޯ ސުވާލު ކުރުމުން ކުޅަދާނަ ޑައިރެކްޓަރު ބުނީ އެ ނިންމުމުގެ ބާރު އޮތީ ސީދާ ނެޓްފްލިކްސްގެ އަތުގައި ކަމަށެވެ.
"ދެވަނަ ސީޒަނެއް ހަދާނެތޯ ނިންމާނީ އަހަންނެއް ނޫން. ނެޓްފްލިކްސް އިން އެގޮތަށް ބޭނުންވެއްޖެ ނަމަ އަހަރެން އެކަމާއިގެން ކުރިއަށް ދާނަން." ބަންސާލީ ބުންޏެވެ.
މި މަހުގެ 1 ގައި ޕްރީމިއާކުރި "ހީރާމަންޑީ" އަކީ އިންޑިއާ އަށް މިނިވަންކަން ލިބުމުގެ ކުރިން ލާހޯރްގެ ރެޑް ލައިޓް އޭރިގައި އުޅުނު ޝާހީ ޖާރިޔާއިންގެ ވާހަކަ ކިޔައިދޭ އެއްޗެކެވެ. މީގެ ކާސްޓުންނަކީ މަނީޝާ ކޮއިރަލާ، ސޮނާންޝީ ސިންހާ، އަދިތީ ރާއޯ ހައިދަރީ، ސަންޖީދާ ޝެއިހް، ޝަރްމިން ސޭގަލް، ރިޗާ ޗައްޑާ، ފަރުދީން ޚާން، ތާހާ ޝާހް، ޝޭކަރް ސުމަން އަދި އޭނަގެ ދަރިފުޅު އަދިޔަޔަން ސުމަން އެވެ.
އަށް އެޕިސޯޑްގެ "ހީރާމަންޑީ" ގެ ޖާދޫގައި ގިނަ ބަޔަކު ޖެހިފައިވާ އިރު، މި ލިޔެ، ޑައިރެކްޓްކޮށް މިއުޒިކް ވެސް ހެދީ ބަންސާލީ އެވެ.
އޭނަގެ އެންމެ ފަހުގެ ފިލްމަކީ 2022 ގެ "ގަންގޫބާއީ ކަތިއަވާޅީ" އެވެ. އަދި ކުރިއަށް އޮތް ފިލްމަކީ އަންނަ އަހަރު ގެނެސްދޭން ހަމަޖެހިފައިވާ "ލަވް އެންޑް ވޯ" އެވެ.