މަސްވެރިކަމުގެ އުފެއްދުންތައް ޕްރޮމޯޓު ކުރަން ސަރުކާރުން އުފެއްދި މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން (އެމްއެފްއޯއާރުއެމްޕީސީ) ގެ ބޯޑު އެކުލަވާލައިފި އެވެ.
އެ ކުންފުނީގެ މެނޭޖިން ޑިރެކްޓަރަކަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އައްޔަންކުރީ
އަހުމަދު ޒަރީރު އެވެ.
ބޯޑްގައި ދެން ހިމެނޭ މެމްބަރުންނަކީ މުންޝިދާ އިބްރާހިމް، އަހުމަދު ޝިފާޒް، އަހުމަދު ޔާމީން އަދި އާދަމް މަނިކު އެވެ.
މިދިޔަ އަހަރުގެ ޑިސެމްބަރުގައި އުފެއްދި އެމްއެފްއޯއާރުއެމްޕީސީގެ ބޭނުމަކީ އެކުއަކަލްޗާ އާއި މެރިކަލްޗާ އާއި ކަނޑުގެ ހުރިހާ ވަސީލަތްތަކެއް ހިމެނޭހެން ރާއްޖޭގެ މަސްވެރިކަމުގެ އުފެއްދުންތައް އިޝްތިހާރުކޮށްގެން އޭގެން ލިބޭ މަންފާ އިތުރުކުރުމެވެ. އެގޮތުން އެ ކުންފުނިން ދިވެހި އުފެއްދުންތަކަށް ހާއްސަ ބްރޭންޑެއް ތައާރަފުކޮށް އެ ތަކެތި ޕްރީމިއަމް ޕްރޮޑަކްޓެއްގެ ގޮތުގައި ރާއްޖެ އާއި ބައިނަލްއަގުވާމީ ބާޒާރުގައި ވިއްކުމާއި އާ މާކެޓުތައް ހޯދުން ހިމެނެ އެވެ.
ކުންފުންޏަށް މި އަހަރު ކަނޑައަޅާފައި ވަނީ 37 މިލިއަން ރުފިޔާގެ ބަޖެޓެކެވެ.