އައްޑޫ ހިތަދޫން ޓޫރިޒަމާ ގުޅުން ހުރި ވިޔަފާރިތަކަށް ކުއްޔަށް ބިން ދޭން ނިންމާފައިވާ ސަރަހައްދު ކައުންސިލުން ސާފުކޮށްފި އެވެ.
ކައުންސިލުން ބުނީ ޓޫރިޒަމާ ގުޅުން ހުރި ޚިދުމަތްތައް ދިނުމަށް ޚާއްސަކުރެވޭ ސަރަހައްދުގައި އެކި ކަހަލަ ވިޔަފާރިތައް ހިންގާނެ ކަމަށެވެ. އެގޮތުން އެ ސަރަހައްދުގައި ތިން ރެކްރިއޭޝަން ޑައިވިން ސެންޓަރާއި ތިން ވޯޓަ ސްޕޯޓްސް ސެންޓަރާއި ތިން އެކްސްކާޝަން ސެންޓަރުގެ އިތުރުން ތިން ސުވެނިއަ ޝޮޕްގެ ހިދުމަތްތައް ގާއިމުކުރެވޭނެ ކަމަށް ކައުންސިލުން ބުންޏެވެ.
އައްޑޫގައި ލޯކަލް ޓޫރިޒަމް ކުރިއަރުވައި ތަރައްގީކޮށް ހިންގުމަށް މީގެ ކުރިން އައްޑޫގެ އެކި އަވަށްތައް ހިމެނޭ ގޮތަށް ޓޫރިޒަމް ޒޯންތަކެއް ވެސް ކަނޑައަޅައި އެކި ފަރާތްތަކާ ބިން ހަވާލުކޮށްފައިވެ އެވެ. އެކަމަކު އެއިން އެއްވެސް ތަނެއްގައި މިހާތަނަށް ހިދުމަތް ދޭން ފެށިފައެއް ނުވެ އެވެ.
އެގޮތުން ގިނަ ބިންތަކުގައި މިހާތަނަށް އެއްވެސް މަސައްކަތްތަކެއް ވެސް ކުރެވިފައި ނުވާކަން ފާހަގަކުރެވެ އެވެ.
އައްޑޫ ބިން ހިއްކަން 2022 ގައި ހިންގި ބިޔަ މަޝްރޫއުގެ ތެރޭގައި ވެސް ޓޫރިޒަމަށް ހާއްސަކޮށްގެން ތިން ރަށެއް ހިއްކާފައިވެ އެވެ. އެކަމަކު އަދި މިހާތަނަށް އެއިން ތަނެއްގައި ވެސް އެއްވެސް މަޝްރޫއެއް ހިންގަން އުޅޭކަމުގެ ކުލަވަރެއް ނެތެވެ.
މި ސަރުކާރުން އައްޑޫގައި އައްސޭރި ޓޫރިޒަމް ޕްރޮޖެކްޓެއް ކުރިއަށް ގެންދަން ނިންމާފައިވާ އިރު، އިންޓަގްރޭޓެޑް ޓޫރިޒަމަށް ހާއްސަކޮށްގެން ތަރައްގީ ކުރަން ނިންމާފައިވާ ހަންކެޑެ ޕްރޮޖެކްޓް މިދިޔަ މަހު ބޭއްވި ރައްޔިތުންގެ މަޖިލިސް އިންތިހާބާ ދިމާކޮށް، އިފުތިތާހުކޮށްފައިވެ އެވެ.