ފިލްމުތަކަށް ސޮއިކުރާ އިރު، ކުޅެން ލިބޭ ކެރެކްޓާގެ ދިގުމިނަށް ނުބަލާ ކަމަށާއި އެންމެ އިސްކަން ދެނީ ކޮލިޓީ މަސައްކަތްތަކަށް ކަމަށް ބޮލީވުޑްގެ ޒުވާން ބަތަލާ ކިއާރާ އަދުވާނީ ބުނެފި އެވެ.
މިހާތަނަށް ކާމިޔާބު ފިލްމުތަކެއް ކުޅެފައިވާ އުންމީދީ ބަތަލާ ފިލްމު ކޮމްޕޭނިއަން އަށް ދިން އިންޓަވިއުއެއްގައި ބުނީ އަބަދު ވެސް އިސްކަން ދެނީ "ކުއަންޓިޓީ އަށް ވުރެ ބޮޑަށް ކޮލިޓީ އަށް" ކަމަށެވެ.
"އެހެންވެ ފިލްމަކަށް އެއްބަސްވާ އިރު ނުބަލަން އަހަރެންގެ ސްކްރީން ޓައިމް ދިގުތޯ ކުރުތޯއެއް. ބޭނުން ވަނީ ކޮލިޓީ މަސައްކަތްތަކެއް ކުރަން." އެކްޓަރު ސިދާތު އާނަންދުގެ އަންހެނުން ބުންޏެވެ.
"ޝޭރުޝާ" އާއި "ޖުގް ޖުގް ޖިއޯ" އާއި "ސަތިއަޕްރޭމް ކާތާ" ގެ އިތުރުން "ބޫލް ބުލައްޔާ 2" ފަދަ ކާމިޔާބު ފިލްމުތައް ކުޅެފައިވާ ކިއާރާގެ އަތުގައި މި ވަގުތު ހުރި ބޮޑެތި ޕްރޮޖެކްޓްތަކުގެ ތެރޭގައި ރިތިކް ރޯޝަނާއި އެންޓީއާރް ޖޫނިއާގެ "ވޯ 2" އާއި ރަންވީރު ސިންގްގެ "ޑޮން 3" އާއި މަޝްހޫރު ތެލެގޫ އެކްޓަރު ރާމް ޗަރަންގެ "ގޭމް ޗޭންޖާ" ގެ އިތުރުން ކަންނާޑާ އެކްްޓަރު ޔާޝްގެ "ޓޮކްސިކް" ހިމެނެ އެވެ.
ކިއާރާ ބުނީ ބަތަލުން ލީޑްކުރާ ބޮޑެތި ފިލްމުތަކުގައި ހިއްސާވި ނަމަވެސް ވަރުގަދަ އަންހެން ކެރެކްޓާތަކަށް ބިނާކޮށް ހަދާ "ވިމެންނ ސެންޓްރިކް" ފިލްމުތަކަށް ވެސް ޝައުގުވެރިވާ ކަމަށެވެ. އެހެންވެ ހިތްހަމަޖެހޭ ކަހަލަ ކޮންމެ ޕްރޮޖެކްޓަކާ ހަވާލުވާވާނެ ކަމަށް ބުންޏެވެ.
ކިއާރާ ބޮލީވުޑަށް ނުކުތީ 2014 ގެ "ފަގްލީ" އިންނެނެވެ.