ކުރިން އަންނަ މަހު ސިނަމާތަކަށް ގެންނަން ނިންމި ކަމަލް ހަސަންގެ ފިލްމު "އިންޑިއަން 2" ޖުލައި އަށް ފަސްކޮށްފި އެވެ.
ފިލްމުގެ އާ ޕޯސްޓަރަކާ އެކީ އިއްޔެ ބުނީ މިހާރު ބެލުންތެރިންނަށް ފިލްމު ދޫކޮށްލަން ނިންމާފައި ވަނީ ޖުލައި 12 ގައި ކަމަށެވެ. މި އަހަރުގެ އެންމެ އުންމީދީ އިންޑިއާގެ ފިލްމުތަކުގެ ތެރޭގައި ހިމެނޭ "އިންޑިއަން 2" އަކީ ޑައިރެކްޓަރު އެސް ޝަންކަރްގެ ކަމަލް ހަސަނާ އެކީ 1996 ގައި ގެނެސްދިން ކާމިޔާބު އެކްޝަން ފިލްމު "އިންޑިއަން" ގެ ސީކްއެލް އެވެ.
ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި ފިލްމުގެ ބަތަލާއިންނަކީ އުރްމިލާ މަޓޯންޑްކަރާއި މަނީޝާ ކޮއިރަލާ އެވެ.
"އިންޑިއަން" ގެ މިއުޒިކް ތައްޔާރުކުރީ އޭއާރް ރަހުމާނެވެ. އާ ފިލްމުގެ މިއުޒިކް އަނިރުދު ތައްޔާރުކޮޮށްފައިވާ ފިލްމުގެ ފުރަތަމަ ލަވަ މި މަހުގެ 22 ގައި އާންމު ކުރާނެ އެވެ.
"އިންޑިއަން" ގެ ފުރަތަމަ ބައި ގެނެސްދިންތާ 28 އަހަރު ފަހުން "އިންޑިއަން 2" ގެނެސްދޭ އިރު، މި ފިލްމުގެ ބަތަލާއިންނަކީ ރަކުލް ޕްރީތު ސިންގް އާއި ކާޖަލް އަގަރްވާލެވެ.