އިރާންގެ ރައީސް އިބްރާހީމް ރައިސީ އަވަހާރަވުމާ ގުޅިގެން ރައީސްގެ ޒިންމާތައް ނައިބު ރައީސް މުހައްމަދު މުހްބަރުއާ ހަވާލުކުރަން ނިންމައިފި އެވެ.
އިރާންގެ ގާނޫނު ބުނާ ގޮތުން ރައީސް އަވަހާރަވެއްޖެ ނަމަ، ނައިބު ރައީސާ ވެރިކަން ހަވާލުކޮށް 50 ދުވަސް ތެރޭގައި އާ އިންތިހާބެއް ބާއްވަން ޖެހެ އެވެ.
މީޑިއާތަކުން ބުނި ގޮތުގައި ރައީސްގެ ޒިންމާތައް ނައިބު ރައީސާ ހަވާލުކުރަން ނިންމާފައިވާ އިރު، އެކަން ކުރިއަށް ގެންދަން ނިންމާފައި ވަނީ ރޫހާނީ ލީޑަރު އާޔަތުﷲ އަލީ ހާމަނާއީގެ ލަފާގެ މަތިންނެވެ. ފާހަގަކޮށްލެވޭ ކަމަކީ މުހައްމަދަކީ، އަވަހާރަވި ރައީސާ އެއްގޮތަށް ހާމަނާއީއާ ވަރަށް ގާތް ބޭފުޅެއްކަމެވެ.
އިރާނާންގެ ރައީސް ރައީސް އަވަހާރަވީ ދަތުރުކުރެއްވި ހެލިކޮޓަރު ވެއްޓުނު ހާދިސާގަ އެވެ. އެ ހާދިސާ ހިނގީ އިއްޔެ އެވެ. އަދި ރައީސް އަވަހާރަވިކަން އިރާނުން ކަށަވަރުކޮށް ދިނީ މިއަދެވެ. އިރާންގެ ރައީސް ކަމަށް ރައީސީ އިންތިހާބުވެވަޑައިގެންނެވީ 2021 ގަ އެވެ.