އިންޑިއާގެ ކުޅަދާނަ ޑައިރެކްޓަރު އަނޫރާގް ކެޝަޕް، ތުރިލާއެއްގެ މަސައްކަތް އެކްޓަރު ބޮބީ ޑިއޯލްއާ އެކު ފަށާފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ ޕީޕިން މޫން އިން ބުނި ގޮތުގައި ނަން އަދި އިއުލާން ނުކުރާ މި ފިލްމުގެ ޝޫޓިން މިދިޔަ މަހުން ފެށިގެން މުމްބާއީގައި އަންނަނީ ކުރިއަށެވެ. މީގެ ބަތަލަކަށް ބޮބީ ނަގާފައިވާ އިރު، މި ފިލްމު ވާނީ އަނޫރާގާ އެކީ އޭނަ މަސައްކަތްކުރާ ފުރަތަމަ ފަހަރަށެވެ. މިދިޔަ އަހަރު ރިލީޒްކުރި ރަންބީރް ކަޕޫރްގެ "އެނިމަލް" ގައި ބޮބީ ކުޅުނު ނެގަޓިވް ކެރެކްޓާގެ ސަބަބުން އޭނަގެ މަޝްހޫރުކަން އިތުރުވެ، ގިނަ ހުށަހެޅުންތަކެއް ވެސް މިހާރު އަންނަނީ ލިބެމުންނެވެ.
ޕީޕން މޫން އިން ބުނީ އަނޫރާގްގެ އާ ފިލްމުގެ ކާސްޓްގައި ސާނިއާ މަލްއުތުރާ އާއި އެކްޓަރު ރިތިކް ރޯޝަންގެ ލޯބިވެރިޔާ ސަބާ އާޒާދުގެ އިތުރުން މަޝްހޫރު މަލަޔާޅަމް އެކްޓަރު ޖޯޖޫ ޖޯޖް ވެސް ހިމެނޭ ކަމަށެވެ.
ބޮބީ އާއި ސާނިއާ ކުރިން ވެސް ފިލްމެއްގެ މަސައްކަތްކޮށްފައިވެ އެވެ. އެއި ޝާހްރުކް ޚާންގެ ރެޑް ޗިލީސް އެންޓަޓައިންމަންޓުން 2022 ގައި ނެޓްފްލިކްސް އަށް ގެނެސްދިން ރޮމޭންޓިކް ތުރިލާ "ލަވް ހޯސްޓެލް" ގަ އެވެ.
"ބްލެކް ފްރައިޑޭ" އާއި "ދޭވް ޑީ" އާއި "ގޭންގްސް އޮފް ވަސޭޕޫރް" އަދި "މަންމަރުޒިޔާ" ފަދަ ފިލްމުތައް ގެނެސްދިން އަނޫރާފްގެ އެންމެ ފަހުގެ ފިލްމަކީ މިދިޔަ އަހަރުގެ "ކެނެޑީ" އެވެ.