ސްޓާ ޕްލަސްގެ ސިލްސިލާ "ޔޭ ރިޝްތާ ކިޔާ ކެހެލާތާ ހޭ" ގައި މަސައްކަތްކޮށްފައިވާ މަޝްހޫރު ޓީވީ އެކްޓަރު ހަރްޝަދު ޗޯޕްޅާ ވަރަށް އަވަހަށް ކައިވެނި ކުރާނެ ކަމަށް އާއިލާ އިން ބުނެފި އެވެ.
މި ވާހަކަ މީޑިއާތަކާ ހިއްސާކުރީ 41 އަހަރުގެ އެކްޓަރުގެ ބައްޕަ ޕްރަކާޝް ޗޯޕްޅާ އެވެ. މީޑިއާއަކަށް ދިން އިންޓަވިއުއެއްގައި އޭނަ ބުނީ ދަރިފުޅު ވަރަށް އަވަހަށް ކައިވެނި ކުރަން ތައްޔާރުވަމުން އަންނަ ކަމަށާއި އެކަމާ އާއިލާ އިން ވަރަށް އުފަލުން ތިބި ކަމަށެވެ.
ހަރްޝަދުގެ ކައިވެނީގެ ވާހަކަ ދެކެވެމުން އައި ނަމަވެސް އޭނަގެ އިންނަން އުޅެނީ ކާކާ ކަމެއް އަދި ސާފެއް ނުވެ އެވެ. އާއިލާ އިން ވެސް އެކަމާ ގުޅޭ ތަފުސީލެއް ނުދެ އެވެ.
"ޔޭ ރިޝްތާ ކިޔާ ކެހެލާތާ ހޭ" ގައި ހަރްޝަދު މަސައްކަތްކޮށްފައި ވަނީ 2021-2023 އަށެވެ. އޭގައި އޭނަ ކުޅުނީ ޑރ. އަބިމަންޔޫ ކިޔާ ކެރެކްޓާއެކެވެ. އޭނަ ސިލްސިލާ އިން ވަކިވީ ކެރެކްޓާ ބައްޓަންވަމުން ދިޔަ ގޮތާ މެދު ހިތްހަމަނުޖެހިގެންނެވެ. އޭނަ ކުޅެފައިވާ އިތުރު ސިލްސިލާތަކުގެ ތެރޭގައި "ބޭޕަނާ"، "ހަމްސަފަރްސް"، "ކިޝް ދޭޝް މޭ ހޭ މޭރާ ދިލް" އަދި "ތޭރޭ ލިޔޭ" ހިމެނެ އެވެ.