އިރާންގެ އާ ރައީސް އިންތިހާބު ކުރުމަށް ބާއްވާ އިންތިހާބު ޖޫން 28 ގައި ބޭއްވުމަށް ނިންމައިފިއެވެ.
އީރާނުގެ ރައީސް އިބްރާހީމް ރައީސީ ދަތުރުކުރައްވަމުން ގެންދެވި ހެލިކޮޕްޓަރު ވެއްޓުނު ހާދިސާގައި ރައީސީ ވަނީ އަވަހާރަވެފައެވެ. މިއާއެކު މިހާރު އިރާނުގެ ރައީސްގެ މަގާމާ ހަވާލުވެފައިވަނީ ނައިބުރައީސް މުހައްމަދު މޮޚްބެރްއެވެ. އިރާނުގެ ޤާނޫނުއަސާސީ ބުނާގޮތުން މިފަދަ ހާލަތެއް މެދުވެރިވެއްޖެނަމަ 50 ދުވަހުގެ ތެރޭގައި އިންތިހާބު ބާއްވަންޖެހެއެވެ.
ބޭރު މީޑިއާތަކުން ރިޕޯޓު ކޮށްފައިވާ ގޮތުގައި، އާ ރައީސަކު އިންތިހާބު ކުރުމަށް ބާއްވާ އިންތިހާބު ބޭއްވުމަށް ހަމެޖެހިފައިވަނީ ޖޫން 28 ވަނަ ދުވަހުއެވެ. އިންތިހާބުގައި ވާދަކުރުމުގެ ފުރުސަތު މޭ 30 އިން ޖޫން 3 ގެ ނިޔަލަށް ލިބޭނެއެވެ.
ރައީސީ އިރާންގެ ރައީސްގެ މަގާމަށް އިންތިހާބުވީ 2021 ވަނަ އަހަރުއެވެ.
ހެލިކޮޕްޓަރު ވެއްޓުނު ހާދިސާގައި އީރާނުގެ ރައީސް އިބްރާހީމް ރައީސީގެ އިތުރުން ފޮރިން މިނިސްޓަރު ހުސައިން އަމީރު އަބްދުالله ހައިންވެސް ވަނީ އަވަހާރަވެފައެވެ. އިރާނުގެ މީޑިއާތަކުން ރިޕޯޓުކޮށްފައިވާ ގޮތުގައި އެކްސިޑެންޓު ހިނގީ ރައީސީ، އެގައުމުގެ އަވަށްޓެރި އަޒަރުބައިޖާނަށް ކުރެއްވި ދަތުރުފުޅަށްފަހު އެނބުރި ގައުމަށް ވަޑައިގެންނެވި މަގުމަތީގައެވެ.