ސޯޝަލްމީޑިއާ ޕްލެޓްފޯމް، ޓިކްޓޮކުގައި އަންހެން ހެދުން އަޅައިގެން އުޅުނު މައްސަލައިގައި ހައްޔަރު ކުރި މުހައްމަދު ނަބީލް (ޔާޔާ ނަބީލް) އިތުރު 15 ދުވަހަށް ބަންދުގައި ބެހެއްޓުމަށް ކްރިމިނަލް ކޯޓުން އަމުރު ކޮށްފިއެވެ.
އާންމު އިޖުތިމާއީ މިންގަނޑުތަކާ ހިލާފަށް ނިވާކަންކުޑަ އަންހެން ހެދުން އަޅައިގެން ސޯޝަލްމީޑިއާގައި ވީޑިއޯ ޝާއިއުކުރަމުންދިޔަ މައްސަލައިގައި ނަބީލް ހައްޔަރު ކޮށްފައިވަނީ ކޯޓު އަމުރެއްގެ ދަށުންނެވެ. އޭނާގެ ބަންދަށް ފުރަތަމަ 15 ދުވަސް ދީފައިވަނީ މޭ 5 ވަނަ ދުވަހުއެވެ.
އެ 15 ދުވަހުގެ މުއްދަތު ހަމަވާތީ އިއްޔެ ކޯޓަށް ހާޒިރުކުރުމުން ކްރިމިނަލް ކޯޓުން ވަނީ އޭނާގެ ބަަންދަށް އިތުރު 15 ދުވަސް ދީފައެވެ. މީނާގެ ހައްޔަރު އަދި ބަންދުގެ 6 ރެކޯޑު އޮންނަ ކަމަށް ކްރިމިނަލް ކޯޓުގެ އަމުރުގައި ފާހަގަކޮށްފައިވެއެވެ.
މި މައްސަލައިގައި މީނާ ފުރަތަމަ ހައްޔަރުކޮށް ބަންދު ޖެހުމަށް ކޯޓަށް ގެންދިއުމުން މީނާ ކޯޓުގައި ބުނެފައިވަނީ، އާންމު އިޖުތިމާއީ މިންގަނޑުތަކާ ހިލާފަށް ނިވާކަންކުޑަ އަންހެން ހެދުން އަޅައިގެން ސޯޝަލްމީޑިއާގައި ވީޑިއޯ ޝާއިއުކުރަމުންދިޔައީ މީނާއަށް ލިބިދޭ ޚިޔާލުފާޅުކުރުމުގެ މިނިވަންކަމުގެ ދަށުން ކަމަށެވެ.
މީގެކުރިން ނަބީލް ވަނީ ބަރަހަނާ ފޮޓޯ އާއި ފާޅުކަން ބޮޑު ގޮތެއްގައި އޮރިޔާންކާޑު އުފައްދާ އާންމު ކުރި މައްސަލާގައި އެއް އަހަރާއި އެއް މަހާއި ހަ ދުވަހަށް ޖަލަށް ލާފައެވެ.