ދޮށީ ދަރިފުޅު އާރަވް ބާޓިއާ އެއްވެސް ވަރަކަށް ފިލްމީ މަސައްކަތްތަކަށް ޝައުގުވެރި ނުވާ ކަމަށާއި އެހެންވެ އޭނަ ފިލްމީ ދާއިރާ އިން ނުފެންނާނެ ކަމަށް އަކްޝޭ ބުނެފި އެވެ.
މީޑިއާއަކަށް ދިން އިންޓަވިއުއްގައި އަކްޝޭ ބުނީ 22 އަހަރުގެ ދަރިފުޅު ކިޔެވުމަށް ވަރަށް ބޮޑު ޝައުގުވެރި ކަމެއްދޭ ކަމަށާއި މިހާރު ވެސް އާރަވް އަންނަނީ އިނގިރޭސިވިލާތުގެ ލަންޑަން ޔުނިވަސިޓީގައި ކިޔަވަމުން ކަމަށެވެ. އަކްޝޭ ބުނީ ދަރިފުޅަކީ ވަރަށް ސާދާ ކުއްޖެއް ކަމަށާއި އޭނަ އުޅެން ބޭނުން ވަނީ ވެސް އެގޮތަށް ކަމަށެވެ.
"އުމުރުން ސާދަ އަހަރުން ފެށިގެން އެކަނި އާރަވް އުޅެނީ. ކުރަން ޖެހޭ ހުރިހާ ކަމެއް ވެސް އޭނަ ކުރަނީ އަމިއްލަ އަށް،" އަކްޝޭ ބުންޏެވެ. "އެއީ ކެއްކުން ކަމަށް ވިޔަސް، އެއްޗެހި ދޮވުން ކަމަށް ވިޔަސް އަދި ގޭތެރޭގައި ކުރަން ޖެހޭ އެހެން ކަންކަން ކަމަށް ވިޔަސް އާރަވް އަމިއްލަ އަށް ހުރިހާ ކަމެއް ކުރަނީ."
އޭނަ ބުނި ގޮތުގައި ދަރިފުޅަކީ ވަރަށް ބޮޑަށް އިގުތިސާދު ވެސް ކޮށްގެން ދިރިއުޅޭ ކުއްޖެއްކެވެ. އެހެންވެ އަގުބޮޑު ހެދުން ގަތުމާއި އެ ނޫން ވެސް ބޭކާރު ހަރަދުތައް ކުރުމަކީ އާރަވް ގަޔާވާ ކަންތައްތަކެއް ނޫން ކަމަށް ބުންޏެވެ.
"އަހަރެން އުފާ ވެސް ކުރަން ވަރަށް ސިމްޕަލްކޮށް ދަރިފުޅު އުޅޭތީ." އަކްޝޭ ބުންޏެވެ.
އާރަވްގެ އިތުރުން އަކްޝޭ އާއި އަންހެނުން ޓްވިންކަލްގެ ކަންނާގެ ހުންނަނީ ނިތާރިއާ ބާޓިއާ ކިޔާ 12 އަހަރުގެ ކުއްޖެކެވެ. އަކްޝޭއާ ކައިވެނިކުރި ފަހުން ޓްވިންކަލް ވެސް ވަނީ ފިލްމު ކުޅުން ހުއްޓާލައިފަ އެވެ. އަދި އޭނަ އަކީ މިހާރު ލިޔުންތެރިއެއް އަދި އިންޓީރިއާ ޑިޒައިނަރެކެވެ.
ޓްވިންކަލް މިދިޔަ އަހަރު ވެސް އިނގިރޭސިވިލާތުގެ ޔުނިވަސިޓީއަކުން ސްކްރީން ރައިޓިން އިން މާސްޓާސް ޑިގްރީ ވެސް ހާސިލުކޮށްފަ އެވެ. އަކްޝޭ އަކީ ބޮލީވުޑްގެ ތަރިންގެ ތެރެއިން އެންމެ ބޮޑު އާމްދަނީއެއް ލިބޭ އެކެކެވެ. އަދި އޭނަ އަކީ އެންމެ ބިޒީ އެއް ތަރި އެވެ.