ކުރީގެ ސަރުކާރުން ފަށާފައި އޮތް ރާއްޖެ ޓްރާންސްޕޯޓް ލިންކް (އާރްޓީއެލް) ގެ ނަމާއި ލޯގޯ ސަރުކާރުން ބަދަލުކުރަން އުޅޭ ވާހަކަ ދޮގުކޮށްފި އެވެ.
މިކަމާ ގުޅޭ ގޮތުން ޓްރާންސްޕޯޓް މިނިސްޓްރީގެ އޮފިޝަލަކު ވިދާޅުވީ އެ ހިދުމަތް މިހާރަށް ވުރެ ރަނގަޅަށް ބައްޓަން ސްޓިއަރިން ކޮމިޓީއެެއްގެ މެދުގައި މަޝްވަރާތަކެއް ކުރެވެމުން އަންނަ ކަމަށެވެ. ނަމަވެސް ނަމާއި ލޯގޯ ބަދަލު ކުރުމާ ގުޅޭ ގޮތުން އެއްވެސް މަޝްވަރާއެއް ކުރެވިފައި ނުވާ ކަމަށާއި ސަރުކާރުގެ ތެރޭގައި އެހަލަ ވިސްނުމެއް ވެެސް ނެތްް ކަމަށް ވިދާޅުވި އެވެ.
ނަމަވެސް ބައެއް މީޑިއާތަކުން ރިޕޯޓްކޮށްފައިވާ ގޮތުގައި އާރްޓީއެލްގެ ނަމާއި ލޯގޯ ބަދަލުކުރުމުގެ ވިސްނުންތަކެއް ސަރުކާރުގެ ތެރޭގައި އޮތުމާ އެކީ އެކަމާ ގުޅޭ ވާހަކަތަކެއް ދަނީ ދެކެވެމުންނެވެ.
އާރްޓީއެލްގެ ދަށުން ފެރީ އާއި ބަހުގެ ހިދުމަތް ރާއްޖޭގެ އެކި ހިސާބުތަކަށް އަންނަނީ ދެމުންނެވެ. މި ހިދުމަތުގެ ބޭނުމަކީ ފެންވަރު ރަނގަޅު އަދި ފަސޭހަ ޕަބްލިކް ޓްރާންސްޕޯޓްގެ ހިދުމަތެއް މުޅި ރާއްޖެ އަށް ފޯރުކޮށް ދިނުމެވެ. އާރްޓީއެލްގެ ހިދުމަތް ދެމުން އަންނަނީ އެމްޓީސީސީއާ ހަވާލުކޮށްގެންނެވެ.
އާރްޓީއެލްގެ ނަމާއި ލޯގޯ ބަދަލު ކުރަން އުޅޭކަމުގެ އަޑުތަކެއް އަރާފައިވާ އިރު، ކުރީގެ ސަރުކާރުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ނަމަން "އާބަންކޯ" އަށް ރީބްރޭބްކޮށް، އާ ލޯގޯއެއް ވެސް ތައާރަފުކޮށްފައި ވަނިކޮށް މި ސަރުކާރުން ވަނީ އެކަން އުވާލައި ކުރީގެ ނަމާއި ލޯގޯ ވެސް އިޔާދަކޮށްފަ އެވެ.