ދިވެހި ކަނޑުމަހާއި އޭގެ އުފެއްދުންތައް ތައްޔާރު ކުރުމަށް ބޭނުންވާ ވަސީލަތްތަކާއި ވިޔަފާރިތައް ގެންނަން ބޭރުގެ އިންވެސްޓަރުންނަށް މިފްކޯ އިން އަބަދުވެސް މަރުހަބާ ކިޔާނެ ކަމަށް އެ ކުންފުނީގެ ސީއީއޯ އަހުމަދު ޝަމާހް ރަޝީދު ވިދާޅުވެ އްޖެ އެވެ.
ތައިލޭންޑުގައި މިހާރު ކުރިއަށްދާ "18 ވަނަ އިންފޯފިޝް ވޯލްޑް ޓޫނާ ކޮންފަރެންސް އެންޑް އެގްޒިބިޝަން" ގައި ވާހަކަ އޭނަ ވިދާޅުވީ މިފްކޯއިން ކޭނަރީ އާއި މަސް ރައްކާކުރާ ވަސީލަތްތަކާއި މަސްކިރާ ބޯޓުފަހަރުތަކަށް ވެސް އިންވެސްޓް ކުރުމަށް އިންވެސްޓަރުންނަށް މަރުހަބާ ކިޔާނެ ކަމަށެވެ.
"ދިވެހި ކަނޑުމަހާއި އޭގެ އުފެއްދުންތަކަށް ދުނިޔޭގެ އިތުރު މާކެޓްތައް ހޯދައި، ފުޅާ ކުރުމަށް މިފްކޯއިން އިސްނަގައިގެން އަބަދުވެސް މަސައްކަތް ކުރޭ،" ޝަމާހު ވިދާޅުވި އެވެ. "ހަމައެއާ އެކު ކޭނަރީ އާއި މަސް ރައްކާކުރާ ވަސީލަތްތަކާއި މަސްކިރާ ބޯޓުފަހަރުތަކަށް ވެސް އިންވެސްޓް ކުރުމަށް ބައިނަލްއަގުވާމީ އިންވެސްޓަރުންނަށް އަޅުގަނޑު މަރުހަބާ ކިޔަން."
އޭނަ ވިދާޅުވީ މިހާރުގެ ރައީސް ޑރ. މުހައްމަދު މުއިއްޒުގެ ހާއްސަ އިސްނެންގެވުމުގެ މަތިން ސަރުކާރާ އެކީ މިފްކޯ އިން އަންނަނީ ދެމެހެއްޓެނިވި މަސްވެރިކަން ކުރުމަށް ކުރަން ޖެހޭ މަސައްކަތްތައް ކުރަމުން ކަމަށާއި ރާއްޖޭގެ ކަނޑުގެ ދިރުންތައް ހިމާޔަތް ކުރުމަށް ވެސް ހުއްޓުމެއް ނެތި މަސައްކަތް ކުރަމުން އަންނަ ކަމަށެވެ.
ޝަމާހު ވިދާޅުވީ މިފްކޯ އިން ކަނޑުމަހުގެ އުފެއްދުންތައް ތައްޔާރު ކުރަނީ ވެސް ދެމެހެއްޓެނިވި ގޮތަށް ކޮލިޓީގެ އެންމެ މަތީ ފަންތީގައި ދެމި ތިބުމަށާއި އިސްރާފު ކުޑަ ކުރުމަށް ކުރަން ޖެހޭ ކަންކަން ބަލައި، ދިރާސާކޮށް، ޓެކްނޮލޮޖީއަށް އިންވެސްޓް ކުރުމުގެ މަސައްކަތް ވެސް އެ ކުންފުނިން ކުރަމުން އަންނަ ކަމަށެވެ.