ބޮޑެތި ބަދަލުތަކަކާ އެކީ ވެލިގަނޑު މޯލްޑިވްސް ރިސޯޓް އަލުން މި އަހަރުގެ ނޮވެމްބަރުގައި ހުޅުވަން ނިންމައިފި އެވެ.
އެ ރިސޯޓް ހިންގަމުން އަންނަ ކްރައުން އެންޑް ޗަމްޕާ ރިސޯޓްސް (ސީސީއާރް) އިން ބުނީ ބޮޑެތި މަރާމާތުތަކަކަށް ފަހު، ޒަމާނީ ހިތްގައިމު ގިނަ ބަދަލުތަކަކާ އެކީ ރިސޯޓް އަލުން ހުޅުވަން ނިންމާފައި ވަނީ މި އަހަރުގެ ނޮވެމްބަރު މަހުގެ ތެރޭގައި ކަމަށެވެ.
ޖުމްލަ 100 ވިލާގެ މި ވެލިގަނޑު ރިސޯޓަކީ ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ސީޕްލޭންގައި ފުރައިގެން 20 މިނިޓުން ދެވޭ ހިސާބުގައި އޮތް ރިސޯޓެކެވެ.
ވެލިގަނޑު ރިސޯޓް ހުޅުވީ 1984 ގަ އެވެ.
މި ރިސޯޓް އަލުން ހުޅުވުމުގެ ތައްޔާރީތައް ބާރަށް ކުރިއަށްދާ އިރު ޖެނެރަލް މެނޭޖަރު ފަތުހުﷲ އިބްރާހީމް ވިދާޅުވީ ވެލިގަނޑު އަލުން އޮޕަރޭޝަނަށް ގެންނަ އިރު، އެތަން ވާނީ މަތީގެ ހިދުމަތްތަކެއް ދެވޭ، ޓޫރިސްޓުންނަށް ވަރަށް ވެސް ތަފާތު ތަޖުރިބާތަކެއް ކުރެވޭނެ ތަނަކަށް ކަމަށެވެ.
ވެލިގަނޑި އަލުން ހުޅުވާ އިރު އަންނަ އޮގަސްޓް މަހުގެ 31 ގެ ކުރިން ބުކްކުރާ ޓޫރިސްޓުންނަށް 40 ޕަސެންޓްގެ ޑިސްކައުންޓެއް ވެސް ދޭން ވަނީ ނިންމައިފަ އެވެ.
ސީސީއާރްގެ ދަށުން ހިންގަމުން އަންނަ ރިސޯޓްތަކުގެ ތެރޭގައި ކުޑަދޫ މޯލްޑިވްސް ޕްރައިވެޓް އައިލޭންޑް، ހުރަވަޅި މޯލްޑިބްސް، ކަގި މޯލްޑިވްސް ރިސޯޓް އެންޑް ސްޕާ އަދި ޖަވަކަރަ އައިލޭންޑްސް ހިމެނެ އެވެ.