މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ މަޤާމްތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެމްޑީޕީން މިއަދު ބުނެފައިވަނީ އެ ޕާޓީގެ ޕާލިމެންޓަރީ ގްރޫޕްގެ އިންތިހާބު 28 މޭ 2024 ވާ އަންގާރަ ދުވަހު އޮންނާނެ ކަމަށެވެ.
މި އިންތިހާބުގައި އެމްޑީޕީ ޕާލިމެންޓަރީ ގްރޫޕްގެ ލީޑަރު، ޕާލިމެންޓަރީ ގްރޫޕްގެ 2 ނައިބު ލީޑަރުން، ސެކްރެޓަރީ ޖެނެރަލް، ސެކްރެޓަރީ ޖެނެރަލް ގެ ނާއިބު، ޗީފް ވިޕް އަދި ވިޕް ގެ 2 މަގާމަށް މެންބަރުން އައްޔަނު ކުރާނެއެވެ.
މި މަޤާމްތަކަށް ވާދަކުރަން ބޭނުންވާ އެމްޑީޕީގެ ޕާލިމެންޓަރީ ގްރޫޕްގެ މެންބަރުން 27 މޭ ގެ 14:00 ގެ ކުރިން އެކަން އެންގުމަށް އެޕާޓީން ވަނީ އެދިފައެވެ.
ރައްޔިތުންގެ މަޖިލީހުގައި އިންތިހާބުގައި 93 ދާއިރާއަށް މެންބަރުން އިންތިހާބު ކުރިއިރު، އެމްޑީޕީއަށް ލިބިފައިވަނީ 12 ގޮނޑިއެވެ. 20 ވަނަ މަޖިލިސްގެ މެންބަރުން ހުވާކުރާނީ މިމަހު 28 ވަނަ ދުވަހުއެވެ.