އަލުން އެނބުރި ފިލްމީ މަސައްކަތްތަކަށް އައިސްފައިވާތީ ކުރިން ކޮށްފައިވާ ކަހަލަ މަސައްކަތްތަކެއް އަލުން ކުރަން ބޭނުންވާ ކަމަށް ބަތަލާ ޕްރިތީ ޒިންތާ ބުނެފި އެވެ.
އޭނަގެ 2003 ގެ ފިލްމު "އަރުމާން" ގެ މަންޒަރެއްގެ ވީޑިއޯއާ އެކީ ޕްރިތީ އިންސްޓަގްރާމްގައި ބުނީ އެ ފިލްމުގައި އޭނަ ކުޅުނު ކަހަލަ ރޯލުތަކެއް އަލުން ކުޅެން ލިބޭނެ ކަމަށް އުންމީދުކުރާ ކަމަށެވެ. އަދި އެ މެޑިކަލް ޑްރާމާ "އަރުމާން" ގައި ކުޅުނު ސޯނިއާ ސިންހާގެ ކެރެކްޓާ އަކީ ކެރިއަރުގައި މިހާތަނަށް ކުޅުނު ހަމައެކަނި ނެގެޓިވް ރޯލު ކަމަށް ވެސް ޕްރިތީ ފާހަގަކޮށްފައިވެ އެވެ.
ދެހާހުގެ ކުރީކޮޅު ވަރަށް ރީތި އަދި އެހާމެ ކާމިޔާބު ފިލްމުތަކެއް ކުޅެފައިވާ 49 އަހަރުގެ ބަތަލާ އެނބުރި އަންނަ ފިލްމަކީ ސަނީ ޑިއޯލްއާ އެކީ ކުޅެމުން އަންނަ ޑައިރެކްޓަރު ރާޖްކުމާރު ސަންތޯޝީގެ "ލާހޯރް، 1947" އެވެ. މީގެ ޝޫޓިންގެ ތެރޭގައި ނަގާފައިވާ ފޮޓޯތަކެއް ވެސް ދާދި ފަހުން ޕްރިތީ ސޯޝަލް މީޑިއާގައި ޕޯސްޓްކުރި އެވެ.
އޭނަ އެންމެ ފަހުން ފެނިފައި ވަނީ ސަނީގެ 2018 ގެ "ބެއްޔާޖީ ސުޕަހިޓް" އިންނެވެ.
ޕްރިތީގެ އެންމެ ކާމިޔާބު ފިލްމުތަކުގެ ތެރޭގައި "ހަރު ދިލް ޖޯ ޕިޔާރު ކަރޭގާ"، "ސަލާމް ނަމަސްތޭ"، "ވީރު-ޒާރާ"، "ކިޔާ ކެހެނާ"، "ކަބީ އަލްވިދާ ނާ ކެހެނާ"، "ކަލް ހޯ ނަ ހޯ"، "ކޮއި…މިލް ގަޔާ" އަދި "ދިލް ޗާތާ ހޭ" ހިމެނެ އެވެ.
އޭނަގެ ފުރަތަމަ ފިލްމަކީ 1998 ގެ "ދިލް ސޭ…" އެވެ.