ސަނީ ޑިއޯލް އާއި އަޔޫޝްމަން ކްރާނާގެ "ބޯޑާ 2" ގެ ޝޫޓިން މި އަހަރުގެ އޮކްޓޯބަރު މަހުގެ ތެރޭގައި ފަށަން ނިންމާފައިވާ ކަމަށް ރިޕޯޓްތައް ބުނެފި އެވެ.
މި ފިލްމަކީ ހިންދީ ސިނަމާ އަށް އައި އެންމެ ކާމިޔާބު ހަނގުރާމނަ ފިލްމުތަކުގެ ތެރޭގައި ހިމެނޭ 1997 "ބޯޑާ" ގެ ދެވަނަ ބައެވެ. ބޮޑު ކާސްޓަކާ އެކީ ގެނެސްދިން އެ ފިލްމު ހެދީ ޑައިރެކްޓަރު ޖޭޕީ ދައްތާ އެވެ. ނަމަވެސް ކުރީގެ ފިލްމުން ހަމައެކަނި ސަނީ ހިމަނައިގެން "ބޯޑާ 2" ހަދަން ތައްޔާރީތައްވަމުން އަންނަ އިރު، މި ފިލްމު ޕްރޮޑިއުސްކުރަނީ ދައްތާގެ ދަރިފުޅު ނިދީ ދައްތާ އާއި ބުޝަން ކުމާރުގެ ޓީ ސީރީޒް ގުޅިގެންނެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ އާ ފިލްމުގެ ޝޫޓިން ފެށުމުގެ ތައްޔާރީތައް މިހާރު ވަރަށް ބާރަށް ކުރިއަށްދާ އިރު، ފިލްމަށް އިތުރު ކާސްޓުން ވެސް ހަމަޖައްސަމުން އަންނަ ކަމަށެވެ. ނަމަވެސް "ބޯޑާ 2" ޑައިރެކްޓްކުރާނީ ކާކު ކަމެއް އަދި ނޭނގެ އެވެ.
މި ފިލްމު އަންނަ އަހަރުގެ ޖެނުއަރީ 23 ގައި ސިނަމާތަކަށް ގެންނަން އޮތީ ތާވަލުކޮށްފަ އެވެ.