ބޮލީވުޑްގެ ތަރި ޓައިގާ ޝްރޮފްގެ ކޮއްކޮ ކްރިޝްނާ ޝްރޮފް ކަލާސްގެ ރިއަލިޓީ ޝޯ "ހަތުރޯން ކޭ ކިލާޅީ" ގެ 14 ސީޒަންގައި ބައިވެރިވެއްޖެ އެވެ.
މަޝްހޫރު ޑައިރެކްޓަރު ރޯހިތު ޝެޓީ ހޯސްޓްކުރާ ޝޯގެ ބައިވެރިން މިހާރު ވަނީ އޭގެ ޝޫޓިން އަށް ރުމޭނިއާ އަށް ވެސް ފުރައިފަ އެވެ.
"ހަތުރޯން ކޭ ކިލާޅީ 14" ގައި ކްރިޝްނާ ބައިވެރިވި އިރު، އޭނަ އަކީ އަބަދު ވެސް ފިޓްނެސް އަށް ވަރަށް ބޮޑު އިސްކަމެއް ދެމުން އަންނަ މީހެކެވެ. ނަމަވެސް މިހާތަނަށް ސެލެބްރިޓީންނާ އެކީ ބާއްވާ މިފަދަ ޝޯއެެއްގައި ކްރިޝްނާ ބައިވެރިވެފައެއް ނުވެ އެވެ. އަދި އޭނަ އަކީ އާއިލާގެ އެހެން މީހުން ގޮތަށް ފިލްމީ މަސައްކަތް ވެސް ކުރާ މީހެއް ނޫނެވެ.
ޓައިގާ، 34، އާއި ކްރިޝްނާ، 31، އަކީ މަޝްހޫރު އެކްޓަރު ޖެކީ ޝްރޮފްގެ ދަރިންނެވެ.
ރޯހިތުގެ ޝޯގައި ބައިވެރިވާން ނިންމުމާ ގުޅޭ ގޮތުން ކްރިޝްނާ ބުނީ މީގެ ދެ އަހަރު ވެސް ކުރިން އޭގައި ބައިވެރިވާން އޭނަ އަށް ހުށަހެޅުންތަކެއް ލިބުނު ކަމަށެވެ. ނަމަވެސް އޭރު އެ ފުރުސަތު ގަބޫލުނުކުރީ ތައްޔާރު ނޫން ކަމަށް ގަބޫލުކުރާތީ ކަމަށް ބުންޏެވެ.
"އުންމީދު ކުރަން ޝޯގައި މި ފަހަރު ބައިވެރިވެ، ރަނގަޅު ޕަފޯމަންސެއް ދެއްކޭނެ ކަމަށް. ވަރަށް އުފާ ވެސް ކުރަން މިހާ ބޮޑު ޕްލެޓްފޯމެއްގައި ހިއްސާވެވޭތީ." ކްރިޝްނާ ބުންޏެވެ.
"ހަތުރޯން ކޭ ކިލާޅީ 14" ގައި ކްރިޝްނާއާ އެކީ 11 ބައިވެރިޔަކު ހިމެނެ އެވެ. މީގެ ތެރޭގައި މުޅިން ވެސް ހިމެނެނީ މަޝްހޫރު ޓީވީ ތަރިންނެވެ. އޭގެ ތެރޭގައި ގަޝްމީރު މަހާޖާނީ، ޝިލްޕާ ޝިންޑޭ، ނިމްރަތު ކޯރް، އަބީޝެކް ކުމާރު، އާޝިޝް މެހެރުތުރާ، ސުމޯނާ ޗަކްރަވަތީ، ޝާލިން ބެނޮޓް، ނިޔަތީ ފަތުނާނީ އަދި އަދިތީ ޝަރުމާ ހިމެނެ އެވެ.
މިދިޔަ އަހަރު ގެނެސްދިން "ހަތުރޯން ކޭ ކިލާޅީ 13" ކާމިޔާބުކުރީ ޑީނޯ ޖޭމްސް އެވެ. މި ޝޯ އަކީ އެމެރިކާގެ މަޝްހޫރު ޝޯ "ފިއާ ފެކްޓާ" ގެ އިންޑިއާގެ ވާޝަނެވެ.