ޗައިނާއިން ޓައިވާންގެ ސަރަހައްދު ވަށައިގެން އަސްކަރީ ތަމުރީނުތަކެއް ފަށައިފިއެވެ.
ޗައިނާއާއި ވަކިވެގަތުމަށް ޓައިވާނުން މަސައްކަތް ކުރަމުންދާއިރު، ޗައިނާއިން ޓައިވާންގެ ސަރަހައްދު ވަށާލައި، އަސްކަރީ ތަމުރީނުތައް ފަށާފައިމިވަނީ މިއަދު ހެނދުނުގެ ވަގުތެއްގައެވެ.
ޗައިނާގެ ސްޓޭޓް މީޑިއާއިން ރިޕޯޓް ކޮށްފައިވާ ގޮތުގައި، ޓައިވާންގެ ވަށައިގެންވާ ކަނޑު އަދި ވައިގެ ސަރަހައްދުގައި މި ތަމުރީނުތައް ކުރިއަށް ގެންދިއުމަށް ވަނީ ހަމަޖެހިފައެވެ. ޗައިނާ އަސްކަރިއްޔާގެ އެކިބައިތައް ގުޅިގެން ކުރިއަށްގެންދާ މި ތަމުރީނުތައް ބުރާސްފަތި އަދި ހުކުރު ދުވަހު ކުރިއަށްދާނެ ކަމަށްވެސް ރިޕޯޓް ކޮށްފައިވެއެވެ.
މި ތަމުރީނުތަކާ ގުޅޭގޮތުން ޗައިނާ އަސްކަރިއްޔާގެ ތަރުޖަމާނެއް ބުނެފައިވަނީ، މި ތަމުރީނުތަކަކީ ޗައިނާއާ ވަކިވެގަނެ މިނިވަންވުމަށް ޓައިވާނުން ކުރާ މަސައްކަތަށް ދެވޭ ވަރުގަދަ އަދަބެއް ކަމަށާއި އަދި މިއީ ބޭރުގެ އެހެން ބާރުތަކުން ޓައިވާންގެ މައްސަލައަށް ވަނުމާ ދެކޮޅަށް ދެވޭ ވަރުގަދަ ހަރުކަށި އިންޒާރެއް ކަމަށެވެ.
The Eastern Theater Command of the Chinese People's Liberation Army (PLA) released demonstration map for Joint Sword-2024A military drills conducted surrounding Taiwan Island https://t.co/R9Pvxh7eh4 pic.twitter.com/4QARy3jDbJ
— China Xinhua News (@XHNews) May 23, 2024
ބޭރުގެ މީޑިއާތަކުން ރިޕޯޓް ކޮށްފައިވާ ގޮތުގައި ޗައިނާގެ އަސްކަރީ ތަމުރީނުތަކާ ގުޅިގެން ޓައިވާނުންވަނީ އެގައުމުގެ އަސްކަރިއްޔާވެސް ހައި އެލާޓަށް ގެނެސްފައެވެ. ޗައިނާއިން އަސްކަރީ ތަމުރީނުތައް ފަށާފައިމިވަނީ ޓައިވާނުގެ އާ ރައީސް މަގާމުގެ ހުވާ ކުރެއްވިތާ މަދު ދުވަސްކޮޅެއްގެ ތެރޭގައެވެ. ޓައިވާންގެ އާ ރައީސް ވިލިއަމް ލައި ޗިންގް-ޓޭ މަގާމުގެ ހުވާ ކުރައްވާފައިވަނީ މިދިޔަ ހޯމަ ދުވަހުއެވެ.
ޓައިވާނަކީ މިނިވަން ގައުމެއްގެ ގޮތުގައި ބަލައިގަންނަން ޗައިނާ އިން ދެކޮޅު ހަދަމުންދާއިރު ޗައިނާ އިން އަބަދުވެސް ދެކެނީ ޓައިވާނަކީ އެގައުމުގެ ޕްރޮވިންސެއްގެ ގޮތުގައެވެ.