އިނގިރޭސިވިލާތުގެ އާންމު އިންތިހާބު ޖުލައި 4 ވަނަ ދުވަހު ބޭއްވުމަށް ނިންމައިފިއެވެ.
އިނގިރޭސިވިލާތުގެ ބޮޑުވަޒީރު ރިޝީ ސުނާކް އިއްޔެ ވާހަކަ ދައްކަވަމުން ވިދާޅުވީ، ޕާލިމަންޓު އުވާލުމަށް ރަސްގެފާނު ޗާލްސްގެ ކިބައިން އެދިވަޑައިގަތުމުން އެކަން ކޮށްދެއްވުމަށް އެއްބަސްވެވަޑައިގެންފައިވާ ކަމަށެވެ. އެހެންކަމުން ޖުލައި 4 ވަނަ ދުވަހު އާންމު އިންތިހާބު ބާއްވާނެކަން ސުނާކް އިއުލާނު ކުރެއްވިއެވެ.
މިއީ ސުނާކް 2022 ވަނަ އަހަރު އިނގިރޭސި ބޮޑުވަޒީރުކަމާ ހަވާލުވެވަޑައިގެންނެވިފަހުން ރައްޔިތުންގެ ވޯޓަކާ ކުރިމަތިލައްވާ ފުރަތަމަ ފަހަރެވެ.
އާންމު އިންތިހާބު ބާއްވާނެކަން އިއުލާނުކޮށްފައިވާއިރު އިދިކޮޅު ލޭބާ ޕާޓީގެ ލީޑަރު ކިއާ ސްޓާމާ ވަނީ ބަދަލަކަށް ވޯޓުދިނުމަށް ގޮވާލާފައެވެ.
އިނގިރޭސި މީޑިއާތަކުން ރިޕޯޓް ކޮށްފައިވާ ގޮތުގައި މީގެކުރިން އާންމު އިންތިހާބު ބާއްވާނެ ކަމަށް ގަބޫލު ކުރެވުނީ އޮކްޓޫބަރު އަދި ނޮވެމްބަރު ހިސާބުގައެވެ. އަދި ޖުލައި މަހު އިންތިހާބު ބޭއްވުމަށް ނިންމުމަކީ އިންތިހާބު ބާއްވާނެކަމަށް މީގެކުރިން ބެލެވުނު މުއްދަތަށްވުރެ މާ އަވަސް ތާރީހެއް ކަމަށްވެސް ރިޕޯޓް ކޮށްފައިވެއެވެ.