އައްޑޫގައި ފްލޯޓިން ރިސޯޓް ކޮންސެޕްޓަށް މަޝްރޫއެއް ކުރިއަށް ގެންދަން ކުންފުންޏަކުން ހުށަހެޅި ޕްރޮޕޯސަލް ހުއްދަ ދޭން ކައުންސިކުން ފާސްކޮށްފި އެވެ.
އެ ޕްރޮޕޯސަލް ކައުންސިލަށް ހުށަހެޅީ ސީ މޯންސްޓް އެލްއެލްސީ ކިޔާ ކުންފުންޏަކުންނެވެ. އެ ކުންފުނިން ހުށަހެޅި ގޮތަށް އެކަން ކުރިއަށް ގެންދަން ޑެޕިއުޓީ މޭޔަރު މުހައްމަދު ޝުއާއު ހުށަހަޅުއްވައި މީދޫ ކައުންސިލަރު ސާލިހާ ތާއީދު ކުރައްވާފައިވެ އެވެ.
ކައުންސިލުން އިއްޔެ ބޭއްވި 142 ވަނަ ޖަލްސާގައި އެ މައްސަލާގައި ގޮތެއް ނިންމުމަށް އިދާރީ މޭޒުން ހުހަށަޅައި ވޯޓަށް އެހުމުން ޖަލްސާގައި ބައިވެރިވެވެވަައިގެންވި ކައުންސިލަރުންގެ އިއްތިފާގުން ވަނީ އެގޮތަށް ފާސްވެފަ އެވެ.
އައްޑޫގައި ފްލޯޓިން ރިސޯޓް ކޮމްސެޕްޓަށް މަޝްރޫއެއް ކުރިއަށް ގެންދަން ކައުންސިލުން ހުއްދަ ދޭން ނިންމި އިރު، ޓޫރިޒަމްގެ ތަފާތު އެކި މަޝްރޫއުތައް އައްޑޫގައި ކުރިއަށް ގެންދަން ރާވާފައި އެބަހުއްޓެވެ. އޭގެ ތެރޭގައި ލޯކަލް ޓޫރިޒަމް ކުރިއަރުވަން ހާއްސަކޮށްގެން ކައުންސިލުން ކަނޑައެޅި ޓޫރިޒަމް ޒޯންތަކާއި އައްޑޫގެ ބިން ހިއްކުމުގެ މަޝްރޫއުގެ ތެރެއިން ރިސޯޓް ތަރައްގީ ކުރަން ހާއްސަކޮށްގެން ހިއްކި ތިން ރަށާއި އިންޓަގްރޭޓެޑް ޓޫރިޒަމަށް ހަންކެޑެ ތަރައްގީ ކުރުމުގެ މަޝްރޫއު ހިމެނެ އެވެ.
މީގެ އިތުރުން މި ސަރުކާރުން ވަނީ އައްޑޫގައި އައްސޭރި ޓޫރިޒަމް މަޝްރޫއެއް ވެސް ކުރިއަށް ގެންދަން ނިންމައިފަ އެވެ.
ނަމަވެސް އައްޑޫގައި ޓޫރިޒަމް ފުޅާކޮށް، ކުރިއަރުވަން ރާވާފައިވާ މިއިން އެއްވެސް މަޝްރޫއެއްގައި އަދި އަމަލީ ސިފަ ޖެހިފައެއް ނުވެ އެވެ.
އައްޑޫގައި މި ވަގުތު ތިން ރިސޯޓެއް އޮޕަރޭޓްކުރެ އެވެ. އެއީ ސައުތު ޕާމް ރިސޯޓާއި ކެނަރީފްގެ އިތުރުން ގަމުގެ އީކްއޭޓަ ވިލެޖެވެ. އައްޑޫގެ ރިސޯޓްތަކުގެ ތެރެއިން ޝަންގްރިއްވިލާ ގިލިގިލި ރިސޯޑް އެންޑް ސްޕާ ބަންްދުކޮށްފައި އޮންނަތާ މިހާރު ހަތަރު ވަރަކަށް އަހަރުވެއްޖެ އެވެ.
އައްޑު އަކީ ގެސްޓްހައުސް ވިޔަފާރި ވެސް ހިންގަމުން އަންނަ ތަނެކެވެ.