ހެންރީ ކެވިލްއާ ގެނެސްދެމުން އައި ނެޓްފްލިކްސްގެ މަގުބޫލު ސިލްސިލާ "ދަ ވިޗާ" ގެ ހަތަރު ވަނަ ސީޒަންގެ ޓީޒާއެއް ދައްކާލައިފި އެވެ.
އާ ސީޒަންގެ އެންމެ ބޮޑު ތަފާތަކަށްވާނީ ކެވިލް ކުޅެމުން އައި ކެރެކްޓާ ޖެރާލްޓްގެ ރޯލުން މި ފަހަރު ލިއަމް ހެމްސްވޯތު ފެނިގެން ދިއުމެވެ. އޭނަ އަކީ މަޝްހޫރު އެކްޓަރު ކްރިސް ހެމްސްވޯތުގެ ކޮއްކޮ އެވެ. އޭނަ އަކީ ބެލުންތެރިންގެ މެދުގައި ބޮޑު މަގުބޫލު ކަމެއް ހޯދި "ހަންގާ ގޭމްސް" ފްރެންޗައިޒްގައި މަސައްކަތްކޮށްފައިވާ އެކްޓަރެކެވެ.
ލިއަމްގެ އެންމެ ފަހުގެ ފިލްމަކީ ފެބްރުއަރީގައި ރިލީޒްކުރި ހަނގުރާމަ ފިލްމު "ލޭންޑް އޮފް ބޭޑް" އެވެ.
"ދަ ވިޗާ" ގެ ޓީމުން ބުނެފައިވާ ގޮތުގައި ފަސް ވަނަ ސީޒަނުން "ދަ ވިޗ" ނިންމައިލަން ހަމަޖެހިފައިވާ އިރު، އެންމެ ފަހު ދެ ސީޒަންގައި ޖެރާލްޑްގެ ކެރެކްޓާ އިން ފެންނާނީ ލިއަމެވެ.
އޭނައާ އެކީ ގެނެސްދޭ ފުރަތަމަ ސީޒަން ޕްރީމިއާ ކުރަނާނެ ތާރީހެއް ނެޓްފްލިކްސް އިން އަދި އިއުލާނެއް ނުކުރެ އެވެ.
ފެންޓަސީއެއްގެ ގޮތުގައި ގެނެސްދެމުން އަންނަ "ދަ ވިޗާ" ގެ ފުރަތަމަ ތިން ސީޒަނާ އެކީ ޖުމްލަ 24 އެޕިސޯޑް ގެނެސްދީފައިވެ އެވެ. މި ސީރީޒް އެންމެ ފުރަތަމަ ގެނެސްދިނީ 2019 ގަ އެވެ. އަދި ތިން ވަނަ ސީޒަން ގެނެސްދިނީ މިދިޔަ އަހަރު އެވެ.