އިންޓަނޭޝަނަލް އެއިޑް ކެމްޕޭން (އައިއޭސީ) އިން ކުރިއަށް ގެންދާ ޞަދަޤާ ޖާރިޔާ ޕްރޮޖެކްޓުގެ ދަށުން ސޮމާލީލޭންޑުގައި ދިވެެހިންގެ ނަމުގައި "މަސްޖިދު އަލް އަދުލު: ގެ ނަމުގައި މިސްކިތެއް ބިނާކޮށް ހުޅުވައިފި އެވެ.
ޖުމްލަ 600 މީހުން ޖާގައިގެ މި މިސްކިތަކީ ކޮންމެ ދުވަހެއްގެ ފަރުޟު ނަމާދުތަކުގެ އިތުރުން، އެތަށް ފަޤީރު ކުދިންނަށާއި އަންހެނުންނަށް ހިލޭ ޤުރުއާނާއި އިސްލާމީ ތައުލީމު ފޯރުކޮށް ދެވޭ ގޮތަށް ބިނާކޮށްފައިވާ މިސްކިތެކެވެ. އެގޮތުން
މުޖުތަމަޢުގެ އަޚްލާޤީ އަދި ރޫޙާނީ މަސްއޫލިއްޔަތު އަހުލުވެރިކުރުމަށާއި، ރިވެތި އަޚްލާޤާއި ހެޔޮކަން ހަރުދަނާ ކުރުމަށްޓަކައި ރަށުގެ އެކިއެކި ވިލެޖު ތަކަށް މި މިސްކިތުގެ ޓީމްތަކުން ދާނީ ގުރޫޕް ދަޢުވާ ޕްރޮގްރާމްތައް ވެސް އެތަނުގައި މިހާރު އަންނަނީ ހިންގަމުންނެވެ.
މި މިސްކިތުގައި ހިމެނޭ ބައިތަކާ ތަކެތީގެ ތެރޭގައި:
* އިމާމަށް ކޮޓަރިއެއް
* ފާހާނާ އާއި ވުޟޫ ކުރުމަށް ހާއްސަ ސަރަހައްދެއް
* މިސްކިތުގައި ކާޕެޓް އަޅާފައި
* ވާރޭފެން ނަގައި ރައްކާކުރެވޭނެ ނިޒާމެއް
* ޓޭންކުތަކުން ފެން ނެގުމަށް ޕަންޕު
* އެމްޕްލިފަޔަ އަދި ހަތަރު ލައުޑް ސްޕީކަރު
އައިއޭސީން ބުނީ މި މިސްކިތް އަދިވެސް އިތުރަށް އަޕްގްރޭޑް ކުރެވޭނެ ކަމަށެވެ. އެހެންވެ އެކަމަށް އެހީވާން ޝައުގުވެރިވާ ފަރާތްތަކަކަށް ޞަދަޤާ ޖާރިޔާ ޕްރޮޖެކްޓުތަކަށް ޙާއްސަ ކުރެވިފައިވާ ހޮޓްލައިން 9458822 އަށް ގުޅައިގެން އިތުރު މައުލޫމާތު ހޯދޭނެ އެވެ.
އައިއޭސީން މީގެ ކުރިން ވެސް ވަނީ އެކި ގައުމުތަކުގައި ދިވެހިންގެ ނަމުގައި މިސްކިތް ބިނާކޮށްފަ އެވެ.